Иштироки Пешвои миллат дар Панели сатҳи баланд оид ба об

Ноябрь 29, 2016 20:12, 690 хонанда
31202617871_e6840360be_z

Душанбе, 29.11.2016 /АМИТ «Ховар»/. Рӯзи 29-уми ноябри соли равон Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ҷаласаи Панели сатҳи баланд оид ба масъалаҳои об, ки дар доираи Саммити оби Будапешт баргузор шуд, иштирок ва суханронӣ намуданд.

Президенти Ҷумҳурии Тоҷикистон муҳтарам Эмомалӣ Раҳмон нахуст ба ҷониби Венгрия ва роҳбари ин давлат барои дар сатҳи баланд ташкил намудани чорабиниҳои муҳим доир ба масъалаҳои об изҳори сипосу миннатдорӣ карда омодагию ҳавасмандии ҷониби Тоҷикистонро барои мусоидат ва иштироки фаъол дар татбиқи Нақшаи амалҳои Панели сатҳи баланд оид ба масъалаҳои об, ки моҳи сентябри соли равон қабул шуда маҷмуан 57 амал ва мавзӯи афзалиятнокро фаро мегирад, изҳор намуданд.

Тавре зикр карда шуд, Тоҷикистон ҷонибдори эълон намудани Даҳсолаи байналмилалии «Об барои рушди устувор» мебошад, ки аз бандҳои асосии ин Нақшаи амалҳо ба ҳисоб рафта лоиҳаи қатъномаи дахлдор оид ба ин масъала дар марҳалаи хотимавии баррасии Маҷмаи кулли Созмони Милали Муттаҳид қарор дорад.

Бо таъкиди Сарвари давлат муҳтарам Эмомалӣ Раҳмон тамоми мавзӯъҳо ва амалҳои афзалиятноки Нақша ниҳоят муҳим ба шумор рафта барои ҳамкорӣ ва муттаҳид намудани кӯшишҳои муштарак ҷиҳати мусоидат ба амалияи дастёбӣ ба Ҳадафҳои рушди устувор ва ҳалли дигар масъалаҳои вобаста ба об заминаи боэътимод ва ҷавобгӯи замон фароҳам меоварад.

Президенти мамлакат муҳтарам Эмомалӣ Раҳмон изҳор доштанд, ки дигар амалҳое, ки Тоҷикистон дар онҳо худро пешсаф мебинад, бо масъалаҳои роҳандозии робитаҳои ҳамшарикиву ҳамкории байналмилалӣ, паст намудани хавфи офатҳои табиӣ, тағирёбии иқлим, дастрасӣ ба оби нӯшокии безарар ва беҳдошт, муҳити зист, инфрасохтору сармоягузорӣ, мудирияти захираҳои об ва аҳамияту нақши он дар иқтисоди устувор ба ҳам пайвастагии зич доранд.

Дар чорабинии муҳим аз ҷониби Президенти Ҷумҳурии Тоҷикистон муҳтарам Эмомалӣ Раҳмон доир ба масъалаҳои муҳимтарини марбут ба об, хусусан сармоягузорӣ ва инфрасохтор дар ин соҳа фикру мулоҳизаҳои судманд баён карда шуд.

Аз ҷумла таъкид гардид, ки ин ду ҷанба дар роҳи ҳалли мушкилоти вобаста ба об бо назардошти чолишҳои нав ва пеш аз ҳама таъсири тағиёрбии иқлиму афзоиши аҳолӣ, ки ба камшавии захираҳои оби нӯшокӣ ва зиёд шудани истеъмоли об оварда мерасонанд, омили калидӣ ва манфиатовар ба ҳисоб мераванд.

Дар чунин шароит таъмини маблағгузории устувору зиёд намудани сармоягузорӣ ба лоиҳаҳои инфрасохтории соҳаи об ва дастгирии ташаббусҳо оид ба беҳтар гардонидани маблағгузории соҳаи об, аз ҷумла бо истифода аз фондҳои глобалии сармоягузории мавҷуда, ба монанди «Фонди иқлими сабз», иқдоми саривақтӣ ва хеле муҳим мебошанд, изҳор доштанд Президенти мамлакат муҳтарам Эмомалӣ Раҳмон.

Дар хотимаи нутқи пурмуҳтавои худ дар ҷаласаи Панели сатҳи баланд оид ба масъалаҳои об Сарвари давлат муҳтарам Эмомалӣ Раҳмон бори дигар омодагии ҷониби Тоҷикистонро ҷиҳати татбиқи Нақшаи амалҳо ва пешбурди ҳадафу мақсадҳои Панели сатҳи баланд оид ба об дар ҳама сатҳу зинаҳо таъкид карда изҳори боварӣ намуданд, ки шарикони Тоҷикистон оид ба рушд дар роҳандозии ташаббусҳои бузург ва татбиқи ҳадафу мақсадҳо дар соҳаи об, ки маблағ ва воситаҳои техникии зиёд, ҳамчунин таҳкими иқтидорҳои мавҷударо тақозо менамояд, кумаку мусоидати худро дареғ нахоҳанд дошт.

30495505274_28972d1c5f_z30495504384_e1147fd232_z30495500224_bc6eceb9bd_z30495499864_5aebfe5ced_z

Ноябрь 29, 2016 20:12, 690 хонанда

Хабарҳои дигари ин бахш

33312236680_cef2b79f35_zМулоқоти Пешвои миллат Эмомалӣ Раҳмон бо Ноиби якуми Президенти Бонки аврупоии таҷдид ва рушд Филипп Беннетт
АВСТРИЯ---Барқияи табрикии Президенти Федералии Ҷумҳурии Австрия Александр Ван дер Беллен ба Президенти Ҷумҳурии Тоҷикистон Эмомалӣ Раҳмон
Эмомали Рахмон ва Александр Ван дер БелленБарқияи табрикии Пешвои миллат Эмомалӣ Раҳмон ба Президенти Федералии Ҷумҳурии Австрия Александр Ван дер Беллен
17545420_1395572757179573_7527709563656798746_oИфтитоҳи як қатор иншооти нав дар фурудгоҳи байналмилалии Хуҷанд ва анҷоми сафари кории Пешвои миллат дар вилояти Суғд
Наврузи боги Вахдат Бобочон ГафуровНаврӯзӣ дар боғи Ваҳдати ноҳияи Бобоҷон Ғафуров
33595620166_e5bafec459_zИштироки Пешвои миллат Эмомалӣ Раҳмон дар барномаи консертӣ дар Кохи фарҳанги «Суғдиён»
33506493771_4a90d3408d_z (1)Оғози корҳои обёрӣ ва азхудкунии заминҳои нав дар мавзеи Сомғори шаҳраки Сайҳуни ноҳияи Бобоҷон Ғафуров
32821266023_1455eba3d5_zОғози кишти пахта дар хоҷагии ба номи Турсунбой Қӯшатови Ҷамоати деҳоти «Исмоил»- и ноҳияи Бобоҷон Ғафуров
33582738686_65e869b73d_zМашварати кории Пешвои миллат Эмомалӣ Раҳмон бо роҳбарону фаъолони вилояти Суғд
33578089866_042d62bac5_zШиносоии Пешвои миллат Эмомалӣ Раҳмон бо рафти корҳои азнавсозӣ дар Ҷамъияти саҳҳомии кушодаи Осоишгоҳи “Зумрад”
33489196191_83f4905234_zИфтитоҳи Боғи фарҳангӣ-фароғатии ба номи Сайфуддини Исфарангӣ
33234250530_e049bf67d4_zОғози фаъолияти ҶДММ «Баракат Исфара» дар шаҳри Исфара