Наврӯзи байналмилалӣ соли 2017 дар шаҳри Турсунзода баргузор мегардад

Декабрь 19, 2016 16:58

ДУШАНБЕ, 19.12.2016 /АМИТ «Ховар»/. Наврӯзи байналмилалии 2017 рӯзҳои 21-22 марти соли оянда дар шаҳри Турсунзода баргузор мегардад. Тибқи қарори маҷлиси назди Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа Абдуҷаббор Раҳмонзода, бахшида ба ҷашни Наврӯзи байналмилалӣ дар тамоми шаҳру навоҳӣ, вазорату идора, муассисаю корхона ва мақомоти давлатӣ озмунҳо, фестивалҳо, олимпиадаҳо, суҳбатҳо,  намоиши расмҳо ва мусобиқаҳои варзишӣ баргузор карда мешаванд.
Ҳамчунин тибқи ин қарор Вазорати фарҳанг, Иттифоқи рассомон ва Академияи мусаввирон вазифадор гардиданд, ки лоиҳаи ангораи ҷашни Наврӯзи байналмилалиро дар муҳлати муайянгардида пешниҳод намоянд.
Дар назар аст, ки ба ҷашни байналмилалии Наврӯз аз хориҷи кишвар, аз ҷумла аз давлатҳои Эрону Афғонистон ва Ӯзбекистон низ меҳмонон даъват карда шаванд.
Интизор меравад, ки Вазорати фарҳанг, Иттифоқи нависандагон ва Нашриёти «Адиб» маҷмӯаи «Ашъори наврӯзӣ»-ро бо фарогирии беҳтарин шеърҳои наврӯзӣ моҳи январи соли 2017 нашр намоянд.
А. Раҳмонзода зикр кард, ки Наврӯзи соли 2017 бояд аз лиҳози сифат, мазмун ва муҳтаво аз чорабиниҳои солҳои гузашта тафовут дошта бошад.
Ёдовар мешавем, ки ҷашни байналмилалии Наврӯз имсол боз ҳам мақоми Мероси ҷаҳонии инсониятро ба даст овард. Қарори пазируфтани ҷашни Наврӯз ба феҳристи «Мероси ғайримоддии ҷаҳонӣ» 30 ноябри соли равон дар 11-умин ҷаласаи Муассисаи илм ва фарҳанги СММ, ки дар шаҳри Аддис Абеба- пойтахти Эфиопия доир шуд, қабул гардид. Ин навбат ба хотири ворид гардидани ҷашни Наврӯз ба феҳристи «Мероси ғайримоддии Юнеско» дархости 11 кишвар, аз ҷумла Тоҷикистон, Озарбойҷон, Афғонистон, Ҳиндустон, Эрон, Ироқ, Қазоқистон, Қирғизистон, Покистон, Туркманистон, Туркия ва Ӯзбекистон пазируфта шуд. Дар ҷаласа намояндагони созмони мазкур гуфтанд, Наврӯз- ин ҷашни бостонии мардуми Шарқ таҳаммул, ҳамбастагӣ ва сулҳро ривоҷ медиҳад ва сазовор аст, ки ба мероси фарҳанги ғайримоддии башарӣ ворид карда шавад.
Хотиррасон мешавем, ки моҳи феврали соли 2010 бо пешниҳоди Тоҷикистон ва як зумра кишварҳои дигар Маҷмаи умумии Созмони Милали Муттаҳид дар 64-умин нишасти ин созмон Наврӯзро ҷашни байналмилалӣ эълон карда буд.
Наврӯз иди миллии мардумони Тоҷикистону Эрону Афғонистон ва миллату қавмҳои дигари сокини Осиёи Марказӣ ва Шарқи Наздик аст, ки ҳар сол рӯзҳои 21-22 март ҷашн гирифта мешавад.

Декабрь 19, 2016 16:58

Хабарҳои дигари ин бахш

Дар Москва ба муносибати 25-солагии таъсиси Ташкилоти заминавии кор бо забонҳо ва фарҳангҳои кишварҳои ИДМ чорабинӣ баргузор гардид
Дар шаҳри Гулистон Фестивали ҷумҳуриявии «Ҳафтаи китоби кӯдакону наврасони Тоҷикистон» оғоз ёфт
Дар вилояти Хатлон Фестивали ҷумҳуриявии «Ҳафтаи китоби кӯдакону наврасон» оғоз гардид
Имрӯз дар Тоҷикистон Рӯзи байналмилалии китоб таҷлил мегардад
Дар Душанбе Фестивали ҷумҳуриявии «Ҳафтаи китоби кӯдакону наврасони Тоҷикистон» оғоз мегардад
Масъалаи баргузории Рӯзҳои фарҳанги Ҷумҳурии Тоҷикистон дар Ҷумҳурии Қирғизистон баррасӣ шуд
Аъҷубасозӣ як бахши ҳунари кулолӣ ва сохтани бозичаҳо аз гилу сафол мебошад
Дар вилояти Суғд бо иштироки меҳмонон аз Узбекистон ва Қирғизистон ҳамоиши фарҳангӣ баргузор гардид
МУЖДАИ НАВРӮЗӢ. «Ёддоштҳо»-и устод Айнӣ барои ҳамзабонони эронӣ ба нашр расид
Бахшида ба Соли фарҳанги китобхонӣ дар вилояти Хатлон китоби «Наврӯзномаи Хатлон» ба табъ расид
Ҳунари балети Тоҷикистон дар Париж муаррифӣ мегардад
Дабири кулли Созмони ҳамкории иқтисодӣ дар Осорхонаи миллӣ намоиши анъанавии «Аз Наврӯз то Наврӯз»-ро тамошо намуд