СУҒД: ДАР ҲАҚҚИ СОБИҚАДОРОН ҲАМВОРА ҒАМХОРӢ МЕНАМОЯН

               Хуҷанд, 5 май. (АМИТ "Ховар", Санавбар Мақсудова). Ба муносибати 64 солагии Ғалаба дар Ҷанги Бузурги Ватанӣ (с.с.1941-1945) бо мақсади расонидани кӯмаки яквақта ба иштирокчиёни ҷанг ва шахсони дар ин ҷанг саробонгумкарда бо қарори раиси вилоят Қоҳир Расулзода аз буҷети вилоят 207,7 ҳазор сомонӣ ҷудо карда шуд. Дар ин бора ба мухбари АМИТ "Ховар" сардори сарраёсати молияи вилоят Анвар Мирзоев хабар дод. Аз ҳисоби ин маблағ иштирокчиёни Ҷанги Бузурги Ватанӣ ва оилаҳои дар ин ҷанг саробонгумкарада ба андозаи 150 (садупанҷоҳ) сомонӣ ва ҳам меҳнаткашони ақибгоҳ ба андозаи 100 (сад) сомонӣ кӯмаки яквақтаи пулӣ гирифтанд.             Чуноне, ки ба мухбири АМИТ "Ховар" дар сарраёати молияи вилоят гуфтанд, роҳбарияти вилоят на фақат дар рӯзҳои иду айём, балки ҳамвора дар хаққи собиқадорон ғамхорӣ менамояд. Масалан, мувофиқи қарори раиси вилоят аз якуми январи соли 2009 ба ҳар иштирокчии Ҷанги Бузурги Ватанӣ (с.с.1941-1945) ва оилаҳои дар ин ҷанг саробонгумкарда иловапулии ҳармоҳа ба нафақаашон ба андозаи 20 сомонӣ дода мешавад. Ҳаҷми чунин иловапулии ҳармоҳа ба меҳнаткашони ақибгоҳ 15 сомониро ташкил медиҳад. Воқеан, дар вилоят имрӯз 1020 нафар иштирокчиёни Ҷанги Бузурги Ватанӣ (с.с.1941-1945), 45 оилаи саробонашонро дар ин ҷанг гумкарда ва 475 нафар меҳнаткашони ақибгоҳ зиндагӣ мекунанд.