ДОНИШҶЎЁНИ ТОҶИК ДАР МАКТАБҲОИ ОЛИИ ТОТОРИСТОН ТАҲСИЛ МЕКУНАНД

                   Душанбе, 27 июн. (АМИТ «Ховар», Людмила Дубинина).- Бо ташаббуси сафоратхонаи Федаратсияи Русия дар Тоҷикистон ва дастгрии Анҷумани ҷаҳонии тоторҳо имсол дар мактабҳои олии ҷумҳурии Тотористон барои хатмкунандагони мактабҳои таҳсилоти ҳамагонии Тоҷикистон 35 ҷой ҷудо карда шуд. Ба мактабҳои олии Тотористон намояндагони миллатҳои гуногуни сокини Тоҷикистон, ғолибони олимпиадаҳои миллию байналхалқӣ ва талабагони боистеъдод фиристода мешаванд. Онҳо дар Донишгоҳи давлатии Қазон, академияи Кама дар шаҳри Набережные Челни, мактабҳои олии соҳавии сохтмон, техникӣ, технологӣ ва ғайра қабул карда мешаванд.                   Раиси ҷамъияти тоторҳои сокини Тоҷикистон Римма Хамзина ба мухбири АМИТ «Ховар» гуфт, ки донишҷӯёни тоҷик солҳои гузашта низ барои таҳсил ба мактабҳои олии Тотористон фиристода мешуданд. Имсол вобаста ба бӯҳрони ҷаҳонии иқтисодию молиявӣ шумораи қабули донишҷӯёни тоҷик ба мактабҳои олии Тотористон нисбат ба солҳои гузашта кам карда шуд.