ПРЕЗИДЕНТИ ЭРОН ДАР МУЛОҚОТИ САРОНИ ДАВЛАТҲОИ СҲШ ШИРКАТ ВАРЗИД

                     Теҳрон, 17 июн. (АМИТ «Ховар» -РИА Новости).- Президенти Ҷумҳурии Исломии Эрон Маҳмуд Аҳмадинажод барои иштирок дар мулоқоти сарони давлатҳои аъзои Созмони ҳамкории Шанхай рӯзи сешанбе ба шаҳри Екатеринбург омад. Бояд гуфт, ки Эрон дар созмони мазкур мақоми мушоҳид дорад. М. Аҳмадинажод дар тадбирҳои рӯзи дуюми мулоқоти сарони давлатҳои СҲШ иштирок намуд.                    Вай мебоист як рӯз пеш ба Екатеринбург меомад, вале сафари худро як рӯз ба таъхир андохт. Тибқи нақша, президенти Эрон мебоист рӯзи душанбе бо Президенти Русия мулоқот мекард. Сабаби дер омадани Президенти Эрон ба Екатеринбург расман шарҳ дода намешавад. Яке аз сабабҳои ин рӯзҳои охир муташанниҷ гардидани вазъияти дохилии сиёсии Эрон вобаста ба интихоботи президенти мамлакат буда метавонад. Интихоботи президенти Эрон рӯзи ҷумъаи ҳафтаи гузашта баргузор гардид. Дар он М. Аҳмадинажод ба 62,63 % овози интихобкунандагон соҳиб гардида, боз президенти Эрон интихоб шуд. Ҳарифи асосии ӯ Мирҳусайни Мӯсавӣ 33,75% ва ду номзади дигари мансаби президентӣ ҳамагӣ бештар аз 2% овозҳоро ба даст оварданд. Баъди эълони натиҷаҳои интихобот муқобилони Аҳмадинажод ва намояндагони созмонҳои мухолифи ҳукумат ба кӯчаҳо баромаданд.  Намоишгарон дӯконҳою мағозаҳоро ғорат карда, мошинҳои раҳгузарро оташ заданд. Байни намоишгарон ва политсия задухӯрдҳо рух доданд. Даҳҳо нафар тарафдорони мухолифин ба ҳабс гирифта шуданд.                                                                                                      Тарҷумон Қудратов А.