БАҚАЙДГИРИИ ИТТИҲОДИЯҲОИ ДИНӢ ДАР ҶУМҲУРӢ ИДОМА ДОРАД

                    Душанбе, 28 июл. (АМИТ «Ховар», Лутфия Эшонқулова).- Имрӯз ҷараёни сабти номи ташкилотҳои динӣ дар шаҳру навоҳии ҷумҳурӣ идома дорад. Дар ин бора вазири фарҳанги Ҷумҳурии Тоҷикистон Мирзошоҳрух Асрорӣ дар нишасти матбуотӣ оид ба ҷамъбасти нимсолаи авали соли ҷорӣ ба намояндагони васоити ахбори омма хабар дод. Ӯ қайд намуд, ки айни ҳол таҳти назорати гурӯҳи ташхиси давлатии диншиносӣ дар 8 минтақаи ҷумҳурӣ иттиҳодияҳои динӣ ба қайд гирифта шуданд. Дар рафти бақайдгирӣ онҳо бо иштироки ходимони дин ва сокинони маҳаллӣ семинарҳои омӯзишӣ доир намуда, оид ба моҳияти Қонун дар бораи «Озодии виҷдон ва иттиҳодияҳои динӣ» маълумот доданд.                     Комиссияи ташхиси давлатии диншиносӣ аз 17 нафар иборат буда, ба он намояндагони Дастгоҳи иҷроияи Президенти ҶТ, Вазорати фарҳанги ҶТ, Маркази исломшиносӣ , Академияи улуми Тоҷикистон ва Маркази тадқиқоти стратегӣ шомиланд.                    Ҳамчунин вазир зикр намуд, ки Вазорати фарҳанг бо истифода аз таҷрибаи давлатҳои ҳамсоя, барномаи фаъолияти ташкилотҳои диниро (консепсияи динӣ) таҳия намуд ва барои муҳокима ба Ҳукумати ҶТ пешниҳод кард. Дар консепсияи мазкур дар бораи дурнамои сиёсати динӣ, муносибати иттиҳодияҳои динӣ бо давлат, зарурати таҳияи консепсия ва ҷорӣ намудани фанҳои динӣ дар макотиби олии кишвар маълумот дода шудааст.                    М. Асрорӣ дар бораи масъалаи ҳаҷ сухан ронда, изҳор дошт, ки имсол зоирон аз рӯи қоидаи нав пеш аз сафар ба ҷойҳои муқаддаси ислом бояд ба муқобили бемории A/H1N1 ба организми худ дору гузаронанд.