БАРРАСИИ МАСЪАЛАИ ТАЪМИНИ БЕХАТАРИИ ПАРВОЗИ ҲАВОПАЙМОҲО

                    Минск, 23 июл. (АМИТ «Ховар», Наргис Бояхмедова). — Рӯзҳои 23 ва 24 июл дар пойтахти Белоруссия — Минск маҷлиси гурӯҳи коршиносони Иттиҳоди Давлатҳои Мустақил бахшида ба такмилу таҳрир ва мувофиқа намудани лоиҳаи Созишномаи ҳамкорӣ дар соҳаи таҳқиқу тафтиши фалокатҳои ҳавоӣ дар қаламрави мамлакатҳои ИДМ баргузор мегардад.                     Лоиҳаи созишнома муқаррар намудани муносибати ягонаро дар масъалаи ташкили ҷараёни таҳқиқ ва тафтиши фалокатҳои ҳавопаймоҳои як давлати ИДМ дар қаламрави давлати дигарро пешбинӣ менамояд. Мамлакатҳои ИДМ барои ин баъди эътибори қонунӣ пайдо намудани созишнома дар давоми се моҳ муассисаи ваколатдори таъмини амнияти парвози ҳавопаймоҳоро муайян хоҳанд кард. Тафтиши фалокатҳои ҳавоӣ, муайян кардани дараҷаи онҳо, ба ҳисоб гирифтан ва назорати фаъолияти кормандони соҳа дар бобати таъмини бехатарии парвозҳо ба зиммаи муассисаи мазкур гузошта мешавад.Қайд кардан лозим аст, ки тафтиши фалокатҳои ҳавопаймоҳо танҳо бо мақсади муқаррар намудани сабаби рух додани онҳо ва додани тавсияҳо дар бораи натиҷаҳои он гузаронида мешавад. Дар ин маврид ҳар гуна мурофиаи судӣ ё тафтишоти маъмурӣ барои муайян намудани гуноҳ ё масъулияти ин ё он мамлакат ё нафари масъул ба таври алоҳида гузаронида хоҳад шуд. Тарҷумон — Қудратов А.