ЧАРО БОНКҲОИ ИСЛОМӢ ДАР ДАВРАИ БӮҲРОНИ МОЛИЯВӢ МУФЛИС НАГАРДИДАНД?

              Душанбе, 15 июл.(АМИТ «Ховар», Марзия Саидова).- Ягон бонки исломӣ дар давраи бӯҳрони молиявӣ муфлис нагаштааст, гуфта мешавад дар ҳисоботи Мактаби иқтисодӣ ва илмҳои сиёсии Лондон (LSE). Муаллифони ин ҳисобот қайд мекунанд, ки бонкҳои исломӣ нисбат ба сохторҳои молиявии анъанавӣ аз бӯҳрони молиявӣ камтар зарар дидаанд ва бо ин роҳ ба онҳо сармоягузорони бештаре таваҷҷӯх зоҳир намудаанд.              Дар ҷаҳон эътимод ба бонкҳои исломӣ ҳам аз ҷониби давлатҳо ва ҳам аз сӯи шаҳрвандони муқаррарӣ афзуда истодааст. "Ягон бонки исломӣ дар вақти бӯҳрон муфлис нагашт ва аз давлат мадад напурсид"- қайд мекунад, яке аз муаллифони ҳисобот профессор Уилсон.             Ба назар чунин мерасад, ки бонкҳои исломӣ аз таъсири шадиди бӯҳрони молиявӣ дар муқоиса бо бонкҳои анъанавӣ дар канор мондаанд. Чунки онҳо аз бозори байнибонкӣ қарз намегиранд, баракс сармояи онҳо аз ҳисоби депозити худашон ба даст меояд.             Таҳлилгар қайд мекунад, ки имрӯзҳо аксарияти ташкилот ва шаҳрвандон ба бонкҳои исломӣ таваҷҷӯҳи зиёд доранд. Яке аз сабабҳои афзудани боварӣ ба бонкҳои исломӣ риоя гаштани ахлоқи ҳамидаи молиявӣ ва аз сӯи дигар сарчашмаи динӣ доштани низоми банкинги исломӣ аст.