ДАҲАИ СИНАМАКОНӢ ДАР ТОҶИКИСТОН

                   Душанбе, 31 июл. (АМИТ «Ховар», Ибодат Давлатова). — Ҳарсол аз 1 то 7 августи соли ҷорӣ дар тамоми ҷаҳон ҳафтаи байналмилали синамакони гузаронида мешавад.                   Бахшида ба ин рӯз Вазорати тандурустии Ҷумҳурии Тоҷикистон аз 1 то 10 августи соли ҷорӣ Даҳаи кўмак ва дастгирии синамаконӣ дар Ҷумҳурии Тоҷикистон, таҳти шиори «Шири модар дар ҳолатҳои фавқулодда ҳаётан муҳим аст» як қатор чорабиниҳоро мегузаронад.                  Шири модар беҳтарин ғизо барои кўдакон мебошад. Шири модарро ягон ғизои сунъӣ иваз карда наметавонад. Дар таркиби шири модар маводҳое ҳаст, ки аз паҳншавии бемориҳои сироятӣ кўдакро ҳифз менамояд.                 Баҳри рушди ғизодиҳии табиии кўдакон Вазорати тандурустии Ҷумҳурии Тоҷикистон як қатор корҳоро ба анҷом расонидааст. Қонуни Ҷумҳурии Тоҷикистон «Дар бораи ҳимояи ғизои табиии кўдакон» соли 2006 қабул гардидааст. Мақсад ва вазифаҳои ин Қонун — муҳайё кардани шароити зарурӣ баҳри ҳифзи саломатии модару кўдак, ғизодиҳии дурусти кўдакони ширмак, тарғиб ва дастгирии давлатии ғизодиҳии табиии кўдакон, баланд бардоштани маърифати санитарии аҳолӣ, танзими ҳуқуқии муомилоти ғизои кўдакон иборат мебошад.