ДОНИШҶЎЁНИ ТОҶИК ДАР ЭРОН ТАҲСИЛ МЕКУНАНД

                   Душанбе, 10 июл. (АМИТ «Ховар», Людмила Дубинина).- 9 июл дар Донишкадаи давлатии забонҳои ба номи С. Улуғзода мулоқоти намояндагони 5 мактаби олии забономӯзии Эрон, Вазорати илм, таҳқиқот ва технологияи Ҷумҳурии Исломии Эрон бо донишҷӯёну омӯзгорони донишкадаи мазкур баргузор гардид. Намояндагони мактабҳои олии Эрону Тоҷикистон ба ҳамдигар дар бораи дастовардҳояшон нақл карданд. Зимни мулоқот масъалаҳои омӯхтани таҷрибаи мусбати ҳамдигар дар соҳаи таълим, ба мактабҳои олии Эрон барои таҳсил фиристодани донишҷӯёни тоҷик ва мубодилаи таҷрибаи пешқадами ҳамдигар баррасӣ карда шуданд. Меҳмонони эронӣ ба китобхонаи донишкада теъдоди зиёди адабиёти гуногунро тӯҳфа карданд.                  Донишҷӯёни тоҷик низ ба меҳмонон тӯҳфаҳо пешкаш намуданд. Ба роҳбари ҳайати мактабҳои олии Эрон ректори Донишгоҳи забономӯзии Теҳрон Маҳбуба Мубашширӣ унвони профессори ифтихории донишкада дода шуд. Дар фарҷоми мулоқот созишномаи ҳамкорӣ ба имзо расид. Дар маросими имзои созишнома ректори Донишкадаи давлатии забонҳо Марҳабо Ҷабборова ва академики Академияи илмҳои ҶТ Камол Айнӣ иштирок доштанд.                                                                                                            Тарҷумаи Зебо Иноятова