«ШАЙХ» НЕЪМАТ КУШТА ШУД

                   Душанбе, 30 июл. (АМИТ «Ховар», Наталя Михайлова). — Қувваҳои ҳукуматӣ шаби 29 июл дар ноҳияи Тавилдара гурӯҳи боқимондаи дастаи мусаллаҳи Неъмат Азизовро ошкор намуданд. Силоҳбадастон ба қувваҳои ҳукуматӣ муқовимат нишон доданд. Дар натиҷаи задухӯрди мусаллаҳона сардори дастаи силоҳбадастон Неъмат Азизов кушта шуд.                  Тавре қаблан хабар дода шуда буд, 11 июл дар Тавилдара дар натиҷаи задухӯрди мусаллаҳонаи силоҳбадастон бо қувваҳои ҳукуматӣ яке аз қумондонони собиқи дастаҳои мусаллаҳи Иттиҳоди мухолифини тоҷик вазири собиқи ҳолатҳори фавқулодда, генерал — лейтенант Мирзо Зиёев ба ҳалокат расид. Аз рӯи маълумоти ВКД, М.Зиёев охири моҳи июн ба гурӯҳи мусаллаҳи ҷинояткор ҳамроҳ гардид, ки таҳти роҳбарии Неъмат Азизов дар кӯҳистони Тавилдара паноҳ бурда буд.                   Н.Азизов шаҳрванди Тоҷикистон буда, дар вазифаи қумондони баталёни Вазорати ҳолатҳои фавқулодда кор мекард, ки дар ноҳияи Тавилдара ҷой дода шуда буд. Ӯ яке аз аъзои фаъоли иттиҳоди мухолифин буд ва соли 1997 баъди имзои Созишномаи сулҳ ба Вазорати ҳолатҳои фавқулодда гирифта шуд.                  Аз дафтари матбуоти ВКД ҷумҳурӣ ба АМИТ «Ховар» хабар доданд, ки айни ҳол амалиёти ҷустуҷӯӣ силоҳбадастони боқимонда давом дорад.