СЎҲБАТИ МУХТАСАРИ РАИСИ БУНЁДИ ҶАҲОНИИ ЭКОЛОГӢ БО ХАБАРНИГОРОН

                   Душанбе, 7 июл. (АМИТ «Ховар», Фарангис Раҳимова).- Президенти Ҷумҳурии Тоҷикистон Эмомалӣ Раҳмон дирӯз 6 июл бо раиси Бунёди ҷаҳонии экологӣ Моника Барбут мулоқот кард.                   Моника Барбут баъди анҷоми мулоқоташ бо Сарвари давлати Тоҷикистон бо хабарнигорон мухтасар сӯҳбат анҷом дод. Вай зикр кард, ки Бунёди ҷаҳонии экологӣ дар шароити имрӯза созмони калонтарине мебошад, ки ҳалли масъалаҳои экологиро ба зимма гирифтааст. Мо дар ҳалли проблемаҳои калонтарини экологӣ аз ҷумла бақои шаклҳои гуногуни ҳаёти зинда дар Замин ва олудашавии муҳити зист саҳми худро мегузорем.   Муассисаҳои бунёди мо дар тамоми мамлакатҳои ҷаҳон фаъолият доранд. Бунёди ҷаҳонии экологӣ то имрӯз ба мамлакатҳои ҷаҳон ба маблағи бештар аз 70 миллиард доллари ИМА кӯмак расондааст. Тоҷикистон ҳам аз кӯмакҳои бунёди мо баҳравар гардидааст, гуфт М.  Барбут. Вай афзуд, ки ҳамроҳи президент корҳои то имрӯз анҷомёфта баррасӣ намуда ва нақшаҳои ояндаи ҳамкорӣ муайян карда шуданд. Ҳамкории мо минбаъд бо назардошти андешидани тадбирҳо барои рафъи оқибатҳои тағйир ёфтани иқлим ба роҳ монда мешавад.                   Инчунин зимни сӯҳбат бо Президент масъалаҳои олудашавии табиати Тоҷикистон мавриди баррасӣ қарор дода шуданд. Маълум аст, ки баъди барҳам хӯрдани Иттиҳоди Шӯравӣ дар қаламрави Тоҷикистон партовгоҳҳои хеле зиёди моддаҳои заҳрноки химиявӣ боқӣ мондаанд ва онҳо ба табиат, муҳити зист ва саломатии одамон таъсири манфӣ расонда метавонанд. Инчунин масъалаҳои ҳамкории минтақавӣ дар соҳаҳои истифодаи оқилонаи захираҳои об, мавриди истифода қарор додани захираҳои нафту газ муҳокима шудаанд. Бунёди ҷаҳонии экологӣ дар давоми се соли охир дар Тоҷикистон барои иҷрои панҷ барнома маблағ ҷудо кард, гуфт дар хотима Моника Барбут.                                                                                                        Тарҷумон Қудратов А.