ФОҶИАИ МИЛЛАТИ РУС

                   Маскав, 14 август. (АМИТ «Ховар» — Лента. ру). — Президенти Федератсияи Русия Дмитрий Медведев 12 август дар Сочи бахшида ба проблемаи майзадагӣ дар мамлакат машварат гузаронд. Солҳои охир барои кам кардани истеҳсол ва истеъмоли нӯшокиҳои спиртдор дар мамлакат, маҳдуд сохтани фурӯши онҳо, кам кардани рекламаи нӯшокиҳои спиртдор ва муқаррар намудани ҷазои сахт нисбати ронандагоне, ки мастомаст мошин меронанд, силсилаи тадбирҳо андешида шудаанд, гуфт Д.Медведев. Вале бо вуҷуди ин дар ин бобат то имрӯз ягон тағйироти назаррас мушоҳида намешавад.                 Кушоду равшан гуфтан мумкин аст, ки майзадагӣ дар мамлакат ба фоҷиаи миллӣ табдил ёфтааст. Аз рӯи маълумоти Вазорати тандурустӣ ва рушди иҷтимоии мамлакат ҳар сокини Русия дар як сол ба ҳисоби миёна 18 литр спирти тоза истеъмол мекунад. Ба ин ҳисоб ҳатто кӯдакони навзод ҳам дохил мешаванд. Ин ба ҳисоби миёна 90 шишаи нимлитра арақ, 720 шиша пиво ва 214 шиша винои 0,7 литраро ташкил медиҳад.                   Ба қавли президент, чунин ҳаҷми калони истеъмоли нӯшокиҳои спиртдор нисбат ба меъёри муқаррарӣ бештар аз 2 баробар зиёд аст.                   Президент таъкид намуд, ки мубориза ба муқобили майпарастию нашъамандӣ бояд муттасил давом дода шавад.                  Д.Медведев дар баробари ин зарурати истифодаи таҷрибаи самарабахши мамлакатҳои дигарро дар мубориза ба муқобили майзадагӣ таъкид намуд.                  Шӯрои Федератсия пешниҳод намуд, ки фурӯши нӯшокиҳои спиртдор ба занони ҳомила, заноне, ки кӯдаки ширмак доранд ва одамони гирифтори бемориҳои гуногун аз ҷумла, майзадагон манъ карда шавад.                   Сардухтури санитарии Федератсияи Русия Геннадий Онишенко моҳи апрел хабар дода буд, ки айни ҳол дар Русия 2,5 миллион шахси майзада ба қайд гирифта шудааст.