ИСТИҚБОЛИ ИСТИҚЛОЛ БО «ФАЙЗИ ИСТИҚЛОЛ»

                  Душанбе,18 август.(АМИТ «Ховар», Марзия Саидова).-Раиси шаҳри Душанбе Маҳмадсаид Убайдуллоев бо мақсади дар сатҳи баланди ташкилӣ ва ҷолибу хотирмон таҷлил намудани ҷашни 18-умин солгарди Истиқлолияти давлатии Ҷумҳурии Тоҷикистон дар шаҳри Душанбе қарор ба тасвиб расонд.                  Мувофиқи он нақшаи замимагардидаи чорабиниҳои Мақомоти иҷроияи маҳаллии ҳокимияти давлатӣ дар шаҳри Душанбе дар робита ба таҷлили сазовори ин санаи муҳими таърихӣ тасдиқ шуда, вазифаҳои тамоми сохторҳои марбута дар ин самт мушаххас гардид.                    Тибқи нақша дар маҷмааи давлатии «Кохи Борбад»-и пойтахт ҷамъомади тантанавӣ ва консерти идонаи устодони санъат баргузор мегардад. Ҳамчунин, сайругашти оммавӣ, барномаҳои идонаи фарҳангию консертӣ, намоишҳои ҳунариву эҷодӣ дар боғҳои фарҳангу фароғатии ба номи С. Айнӣ, «Дӯстии халқҳо» ва «Кӯли ҷавонон», барномаи идона бо иштироки устодони санъат ва ситораҳои эстрадаи тоҷик дар майдони «800-солагии Москва», консерти ҳунармандон ва дастаҳои эҷодкори пойтахт таҳти унвони « Файзи Истиқлол» дар «Амфитеатр» ташкил карда мешавад. Инчунин, намоиш ва фурӯши маҳсулоти қаннодиву нонӣ ва таомҳои миллӣ дар мавзеъҳои чорабиниҳои идона дар назар аст.                  Умед аст, ки сокинону меҳмонони пойтахт ҷашни 18-умин солгарди Истиқлолияти давлатии Ҷумҳурии Тоҷикистонро бо рӯҳияи баланди ватандӯстӣ ва ифтихор аз гузаштаву имрӯзи миллат сазовор истиқбол мегиранд.