МУЛОҚОТ ДАР АРАФАИ КУШОДАШАВИИ НАМОИШГОҲ

                 Душанбе, 4 август. (АМИТ «Ховар», Покиза Маҳмадбекова). — Раиси Палатаи савдо ва саноати ҷумҳурӣ Шариф Саид 3 август дар арафаи кушодашавии намоишгоҳи молҳои истеҳсоли Афғонистон бо раиси Палатаи савдо ва саноати ин мамлакат Қурбон Муҳаммади Ҳақҷӯ мулоқот кард.                 Зимни сӯҳбат масъалаҳои густариши ҳамкорӣ, тайёрӣ ба ифтитоҳи намоишгоҳи байналхалқии «Рушди иқтисодиёти Афғонистон» мавриди баррасӣ қарор гирифтанд, ки имрӯз дар Душанбе кушода мешавад.                  Шариф Саид изҳор намуд, ки ба шарофати сохтмони кӯпрукҳо дар болои дарёи Панҷ ва кушодани роҳҳои ҳавоӣ дар байни Тоҷикистону Афғонистон хариду фурӯши мол дар байни ҳар ду мамлакат сол то сол меафзояд. Қайд карда шуд, ки ҳоло дар Тоҷикистон теъдоди зиёди корхонаҳои муштараки ҳар ду кишвар фаъолият доранд.                 Қурбон Муҳаммади Ҳақҷӯ ба Шариф Саид дар бораи рафти тайёрӣ ба кушодашавии намоишгоҳ, фаъолияти он ва корхонаҳое маълумот дод, ки дар намоишгоҳ ширкат меварзанд.