ТАЙЁРӢ БА ҶАШНИ 65 – СОЛАГИИ ҒАЛАБА ДАР ҶБВ

                        Душанбе, 13 август. (АМИТ «Ховар», Таҳмина Ғоибназарова). — Дирӯз маҷлиси раёсати Шӯрои ветеранҳои ҷумҳурӣ баргузор гардид. Дар он нақшаи тадбирҳои тайёрӣ ба ҷашни 65 — солагии ғалаба дар Ҷанги Бузурги Ватанӣ муҳокима карда шуданд. Иштирокчиёни маҷлис бори дигар пешниҳод карданд, ки фаъолияти ташкилотҳои ветеранҳо ва собиқадорони мамлакат дар доираи тайёрӣ ба ид пурзӯр карда шавад. Инчунин, рафти иҷрои барномаи тайёрӣ ба ид ва қарори дахлдори Ҳукумати ҷумҳурӣ аз 23 октябри соли 2008 баррасӣ карда шуданд.                        Барнома пешбинӣ мекунад, ки ба коргарони ақибгоҳ баробари иштирокчиён ва маъюбони ҷанг ҳуқуқу имтиёзҳои баробар дода шаванд.                        Соли 2010 соли ветеранҳои ҷанг эълон шудааст. 9 майи соли 2010 ба муносибати 65 — солагии Ғалаба дар ҶБВ дар шаҳри Душанбе расми гузашти низомӣ баргузор мегардад. Тибқи нақша ба муносибати ҷашн медалҳои идона бароварда мешаванд.                       Пешниҳод шуд, ки ҳафтаи аввали моҳи майи соли 2010 «Ҳафтаи ёдбуд» эълон карда шавад.                       Моҳи апрели соли 2010 дар боғи Ғалаба аксҳои Қаҳрамонони Иттиҳоди Шӯравӣ ва дорандагони се дараҷаи ордени «Шараф» насб карда хоҳад шуд. Дар ин ҷо инчунин Гулгашти қаҳрамонон васеъ карда мешавад.                       Мухбири АМИТ «Ховар» хабар медиҳад, ки то 9 майи соли 2010 таҳияи «Китоби ёдбуд» ба охир расонда, ҷилди чоруми китоби адиби ҷангномавис Раҳмон Сафаров «Ҳазору як корнамоӣ» чоп карда хоҳад шуд. Дар театрҳои мамлакат бахшида ба мавзӯи ҷанг асарҳои саҳнавӣ намоиш дода мешаванд.Тарҷумон — Қудратов А.