КУШТОРИ САРДОРИ ШӮЪБАИ ҶУСТУҶӮИ ҶИНОИИ ИСФАРА

                  Душанбе, 19 сентябр. (АМИТ «Ховар», Таҳмина Ғоибназарова). – Аз дафтари матбуоти вазорати корҳои дохилии ҷумҳурӣ ба АМИТ «Ховар» хабар доданд, ки шахсони номаълум дирӯз сардори шӯъбаи ҷустуҷӯи ҷиноии ноҳияи Исфара, подполковники 39 – сола Саидумар Саидовро ба қатл расониданд.                  Хабар дода мешавад, ки С. Саидов 18 сентябр тақрибан соати 14 – у 45 дақиқа барои иваз кардани либос ба хонааш меояд. Ӯ аз дарвоза баромада, мехост либосҳояшро ба бордони мошин гузорад. Ҳамин лаҳза шахсони номаълум ба сӯи подполковник аз аслиҳаи оташфишон ду маротиба тир холӣ карданд. Як тир ба сари мақтул ворид гардида, сабаби ҳалокати ӯ шуд. С.Саидов дар ҷои воқеа ҳалок шуд. Кормандони милиса аз маҳалли содир шудани ҷиноят ду тири туфангчаи Макаров ёфтанд.                  Айни ҳол дар вилояти Суғд барои дастгир намудани қотилони С.Саидов амалиёти махсус гузаронида мешавад. Инчунин дар вазорати корҳои дохилӣ гурӯҳи махсуси тафтишотӣ ташкил карда шуд. Ҷараёни тафтишро вазири корҳои дохилӣ Абдураҳим Қаҳҳоров шахсан назорат мекунад.