МУЛОҚОТИ 1У ЗИЁИЁНИ ИЛМӢ ВА ЭҶОДКОРИ ИДМ КУШОДА ШУД

                 Кишинёв, 24 сентябр. (АМИТ «Ховар», Ҳалима Хушқадамова). — Имрӯз дар пойтахти Ҷумҳурии Молдавия — шаҳри Кишинёв мулоқоти 1У – уми зиёиёни илмӣ ва эҷодкори мамлакатҳои ИДМ кушода шуд. Дирӯз ба ин муносибат бо кӯмаки Фонди байнидавлатии ҳамкории фарҳангии давлатҳои ИДМ силсилаи тадбирҳои дорои хусусияти фарҳангию гуманитарӣ баргузор гардиданд.                   Хабар дода мешавад, ки дар мулоқоти мазкур бештар аз 400 нафар иштирок хоҳад кард.                   Дирӯз, аз ҷумла, дар Академияи илмҳои Молдавия маҷлиси умумии Шӯрои Иттиҳодияи байналхалқии академияҳои илмии ИДМ баргузор гардид. Дар он раиси иттиҳодия, раиси Академияи илмҳои Украина, узви ифтихории Академияи илмҳои Молдавия, академик Борис Патон дар мавзӯи «Рушди илми муосир ва нақши он дар шароити бӯҳрони ҷаҳонии молиявию иқтисодӣ» маърӯза кард. Дар муҳокимаи маърӯза намояндагони академияҳои илмии мамлакатҳои ИДМ, аз ҷумла, муовини раиси Академияи илмҳои Тоҷикистон, академик Хуршед Ҳилолов иштирок намуданд.                  Мухбири АМИТ «Ховар» хабар медиҳад, ки дирӯз ҳайати расмии Ҷумҳурии Тоҷикистон таҳти роҳбарии вазири маорифи мамлакат, узви раёсати Фонди байнидавлатии ҳамкории гуманитарии мамлакатҳои ИДМ Абдуҷаббор Раҳмонов барои иштирок дар мулоқоти мазкур ба Молдавия омад. Ба ҳайат муовини вазири фарҳанги Тоҷикистон Фароғат Азизова, муовини аввали раиси Кумитаи кор бо ҷавонон, варзиш ва сайёҳии назди Ҳукумати ҷумҳурӣ Кабирҷон Ҷӯраев, шоира Г.Тоҳирова, дотсенти факултаи ҳуқуқи Донишгоҳи миллии Тоҷикистон Наимҷон Азимов, муовини директори Осорхонаи миллии ба номи К.Беҳзод Зафар Иброҳимов ва дигарон шомиланд.