ШИРКАТИ ЧИНӢ ДАР ТОҶИКИСТОН КОРХОНАИ КИМИЁ МЕСОЗАД

                  Душанбе, 17 сентябр. (АМИТ «Ховар», Наргис Бояхмедова). – Сарвазири Ҷумҳурии Тоҷикистон Оқил Оқилов дирӯз, 16 сентябр бо раиси ширкати муҳандисию бинокории Чин Ванг Зе мулоқот кард. Зимни мулоқот масъалаҳои ҳамкории ҳар ду кишвар дар сохтмони иншооти гуногун мавриди баррасӣ қарор дода шуд.                  Раиси ширкати муҳандисию бинокории Чин изҳор намуд, ки ширкаташ ният дорад дар Тоҷикистон як корхонаи кимиё бунёд созад. Дар ин мавзӯъ имрӯз, 17 сентябр созишнома имзо карда мешавад. Ванг Зе хабар дод, ки ба ноҳияи Ёвон рафта, бо фаъолияти корхонаи кимиёвии он шинос гардида, рафти сохтмони Маркази барқу гармидиҳиро аз назар гузаронидааст.                  Сарвазири Тоҷикистон пешниҳоди меҳмони чиниро дастгирӣ намуда, зикр кард, ки Тоҷикистон ба сохтмони корхонаҳои саноатӣ манфиатдор мебошад. Ҷумҳурии Тоҷикистон барои баҳрабардорӣ аз чунин корхонаҳо имкониятҳои васеъ дорад.                    Мухбири АМИТ «Ховар» хабар медиҳад, ки ширкати муҳандисию бинокории Чин дар сохтмони корхонаҳои саноатӣ ва хусусан корхонаҳои кимиё ва марказҳои барқу гармидиҳӣ таҷрибаи калон дорад.