СОХТМОНИ НБО «САНГТӮДА – 2» ДАВОМ ДОРАД

                 Душанбе, 25 сентябр. (АМИТ «Ховар», Кристина Эрлих). – Аз дафтари матбуоти вазорати энергетика ва саноати ҷумҳурӣ ба мухбири АМИТ «Ховар» хабар доданд, ки корҳои сохтмонӣ дар баъзе қитъаҳои Нерӯгоҳи барқи обии «Сангтӯда – 2» бо сабаби тағйир ёфтани вазъи ҳаво ва баланд шудани сатҳи оби дарёи Вахш муваққатан боздошта шуда буданд. Айни ҳол коргарон суръати корро бо истифода аз вазъи мусоиди ҳаво босуръат давом медиҳанд. Навбати аввали нерӯгоҳ бояд охири соли 2010 ба истифода дода шавад.                  Нерӯгоҳи барқии обии «Сангтӯда – 2» — ро коргарону мутахассисони ширкати «Сангоб» — и Эрон месозанд. Имрӯзҳо ба маҳалли сохтмони нерӯгоҳ барои насби агрегати аввалин аз Эрон таҷҳизоти махсуси техникӣ оварда мешаванд. Агрегати дуюми нерӯгоҳ аввали соли 2011 насб карда хоҳад шуд. Иқтидори лоиҳавии он 930 миллион киловатт – соат дар як сол мебошад. Баландии банди оби нерӯгоҳ ба 31 метр мерасад.                  Сохтмони нерӯгоҳ моҳи феврали соли 2006 шурӯъ шуда буд. Ҳукумати Эрон барои сохтмони он 180 миллион доллари ИМА ва Ҳукумати Тоҷикистон бо ин мақсад 40 миллион доллари ИМА ҷудо карда буданд.                 Баъди анҷоми сохтмони нерӯгоҳ даромади он дар давоми 12,5 сол ба ҷониби Эрон дода хоҳад шуд. Сипас нерӯгоҳи мазкур ба моликияти Тоҷикистон табдил дода мешавад.