В.ВОРОНИН БА ИСТЕЪФО МЕРАВАД

                Кишинёв, 3 сентябр. (АМИТ «Ховар» — Лига. нет.). — Узви Кумитаи марказии Ҳизби коммунисти Молдавия, вакили парлумони мамлакат Вадим Мишин хабар дод, ки Президенти ҷумҳурӣ Владимир Воронин ҳафтаи оянда аз вазифаи сарвари давлат ихтиёран истеъфо хоҳад дод. Мувофиқи Қонуни асосии Молдавия баъди истеъфои президент ваколатҳои он ба зиммаи раиси парлумон Михай Гимпу гузошта мешаванд.                В.Мишин зикр кард, ки президенти мамлакат ҳамзамон вакили парлумон мебошад. Мувофиқи қонун дар ду вазифа кор кардани Сарвари давлат мумкин нест. Бинобар ин В.Воронин қарор дод, ки аз мансаби президент истеъфо дода, ҳамчун вакили парлумон боқӣ монад.                Бояд гуфт, ки мӯҳлати ваколати В.Воронин дар вазифаи президент 7 апрел ба охир расид.                 Парлумони мамлакат баъди истеъфои президент бояд дар давоми ду моҳ интихоботи нави президентро баргузор созад. Ба ҳизби коммунист барои пешбарии номзади нави президент ва ташкили Ҳукумати ҷумҳурӣ дар парлумон 61 овоз лозим аст. Ҳол он, ки коммунистон дар интихоботи моҳи апрел баргузоргардидаи парлумон соҳиби 60 ҷой гардиданд. Барои ба вазифаи президент пешбарӣ кардани номзад аз ҳизби коммунист боз як овози дигар лозим аст. Ҳизбҳои мухолиф аз ин вазъият истифода бурда, муттаҳид гардиданд. Онҳо имкон доранд, ки раиси нави парлумонро интихоб намуда, Ҳукумати мамлакатро ташкил диҳанд.