ДАРСҲОИ МАҲОРАТИ АКТЁРӢ АЗ ОМӮЗГОРОНИ ЧЕЛЯБИНСК

                 Душанбе, 15 октября. (НИАТ «Ховар», Фарангис Раҳимова). — Аз 16 то 22 октябри соли равон барои актёрони Театри давлатии драмаи русии ба номи Владимир Маяковский, хонандагони студияи дар назди театри мазкур ва донишҷӯёни факултаи маҳорати актёрии Донишкадаи давлатии санъати Тоҷикистон ба номи М. Турсунзода, оид ба маҳорати актёрӣ машғулиятҳои дарсӣ баргузор мегарданд.                  Тавре ба АМИТ «Ховар», аз Институти «Ҷамъияти Кушода»-и Бунёди Мадади Тоҷикистон хабар доданд, омӯзгорони Академияи санъати театрии Челябинск, машғулиятҳоро аз рӯи 4 фанни таълимӣ баргузор менамоянд, ки аз инҳо иборат мебошанд: маҳорати актерӣ, нутқ дар саҳна, ҳаракатҳо дар саҳна ва инчунин дарси намунавӣ дар мавзӯи «омӯзиши роҳҳои таъсирбахш кардани нақши актерон, донишҷӯён ва шогирдони студия». Шумораи умумии иштирокчиён аз 45 нафар иборат мебошад.                    Омӯзгорони даъватшуда, кормандони асосии театр студияи «Новая Драма»-ро ташкил медиҳанд, ки дар назди Академияи санъати театрии Челябинск фаъолият мекунанд. Инчунин, берун аз лоиҳа ба маърази тамошобинони пойтахт аз ҷониби театр-студияи «Новая Драма» намоиши асарҳои «Бабы», «Количество» ва «Крик»- дар назар аст.Чорабинии мазкур бо дастгирии барномаи «Фарҳанг ва ҳунар»-и Институти «Ҷамъияти Кушода»-и шаҳри Будапешт, дар чаҳорчӯбаи лоиҳаи «Иттифоқи театрӣ» баргузор мегардад.