ИҶРОИ БАРНОМАИ БАРҚАРОРСОЗИИ СИСТЕМАИ ИРРИГАТСИОНӢ

                Душанбе, 21 октябр. (АМИТ «Ховар», Лаззат Диловарзод).- Бино ба иттилои сардори раёсати мелиоратсия ва захираҳои оби ВМКБ Баҳодур Сулаймонов, дар ноҳияи Рӯшон тибқи барномаи «Маркази идоракунии лоиҳаи барқарорсозии системаи ирригатсионӣ» 700,2 ҳазор доллари амрикоӣ ё худ 2 млн. 297 ҳазор сомонӣ ҷудо карда шуд. Аз маблағи ҷудогардида, дар давоми 9 моҳи соли ҷорӣ ба миқдори 917,1 ҳазор сомонӣ корҳо иҷро гардид.                Аз ҳисоби маблағҳои мутамарказонидашуда бошад, 350 ҳазор сомонӣ дар иншооти «Обёрӣ намудани заминҳои нави хоҷагиҳои деҳқонии Барӯшон ва Дерӯшон» истифода карда шуд.               То моҳи октябри соли ҷорӣ дар мавзеи Дерӯшон ва Барӯшон ба маблағи 146,4 ҳазор сомонӣ корҳо иҷро гардид.               Дар мавзеи Барзуд бошад, обёрӣ намудани 20 га замини нав то таҷлили «Рӯзи Ваҳдати Миллӣ» -и соли 2010 ба нақша гирифта шудааст.