КОНФРОНСИ БАЙНАЛМИЛАЛИИ БОКУ

                  Душанбе, 13 октябр. (АМИТ «Ховар», Наргис Бояҳмедова). — Имрӯз дар пойтахти Озарбойҷон шаҳри Боку конфронси дуюми байналмилалии бонкӣ бо иштироки давлатҳои ИДМ дар мавзӯи «Таҳкими устувории сохторҳои бонкӣ ва молиявии давлатҳои ИДМ» баргузор мегардад. Иштирокчиёни конфронс мушкилоти сохторҳои бонкӣ дар шароити бӯҳронии бозори молиявии ҷаҳон; ногузирии рушди инфраструктураи бонкиву молиявӣ барои созмон додани бозори минтақавии бонкӣ; имкониятҳои таъсис додани фазои ягонаи ҳисоббаробаркунӣ дар ҳудуди давлатҳои Иттиҳодро баррасӣ мекунанд.                  Таваҷҷӯҳи иштирокдорони конфронс ба муҳокимаи ҳамоҳангсозии амалиётҳои якҷояи сохторҳои бонкӣ барои гузаштан аз давраи гирифтани қарзҳои хориҷӣ ба марҳалаи ҷалби сармоягузориҳои дарозмуддат ба иқтисодиёти давлатҳои ИДМ равона карда мешавад. Ҳалли ин масъала, ба болоравии мунтазами иқтисодиёти давлатҳои ИДМ мусоидат карда, рушди бомароми фаъолияти сохторҳои бонкиро таъмин мекунад.