МАҶАЛЛАИ «АЛ-АЗҲАР» ВА ИМОМИ АЪЗАМ

                 Душанбе, 28 октябр. (АМИТ «Ховар», Наргис Бояҳмедова). – Дар шумораи навбатии маҷаллаи «Ал-азҳар» — и Академияи тадқиқоти исломии назди Донишгоҳи «Ал-азҳар» (Ҷумҳурии Мисри Араб) оид ба симпозиуми байналмилалии «Имоми Аъзам ва ҷаҳони муосир», ки рӯзи 5 октябри соли 2009 дар Душанбе барпо шуда буд, матлабҳои хонданӣ нашр шудааст. Дар ин бора ба АМИТ «Ховар» Сафири Ҷумҳурии Тоҷикистон дар Ҷумҳурии Мисри Араб Нарзулло Назаров иттилоъ дод.                  «Дар маҷалла суханронии Президенти Ҷумҳурии Тоҷикистон Эмомалӣ Раҳмон, маърӯзаи Имоми асосии Донишгоҳи «Ал-азҳар» — и Миср шайх Муҳаммад Тантавӣ ва котиби генералии «Ал-азҳар» Алӣ Абдулбоқӣ Шаҳоб дарҷ гардидаанд.» – қайд кард дипломати тоҷик.                    Бояд гуфт, ки дар шумораи моҳи апрелии маҷаллаи мазкур низ мақолаи дигари Сарвари давлати тоҷикон бо номи «Имоми Аъзам ва тафаккури миллии тоҷикон» чоп ва писанди дӯсторони тамаддуни исломӣ шуда буд.