РОҲУ КӮЧАҲО ТО МОҲИ НОЯБР АЗ ТАЪМИР БАРОВАРДА МЕШАВАНД

                 Душанбе, 27 октябр.(АМИТ «Ховар»,Марзия Саидова).-Роҳҳои таҷдидшудаи кӯчаҳои Неъмат Қарабоев ва Лоиқ Шералӣ, тибқи лоиҳаи азнавсозӣ, рӯзҳои наздик кушода хоҳад шуд. Ин масъала дар ҷаласаи Мақомоти иҷроияи ҳокимияти давлатии шаҳри Душанбе, ки дар ҳузури Раиси шаҳри Душанбе Маҳмадсаид Убайдуллоев баргузор шуд, баррасӣ гардид. Доир ба ҳолат ва ҷараёни корҳои таъмиру таҷдид дар роҳҳои пойтахт сардори Сарраёсати ободонии шаҳри Душанбе Самандар Бобоев гузориш дод. Зикр шуд, ки алҳол комиссияи корӣ барои санҷиши корҳои анҷомёфта дар роҳҳои кӯчаҳои таҷдидшаванда ба фаъолият шурӯъ намудааст.                   Вобаста ба ин масъала Раиси шаҳр ба комиссияи марбутаи шаҳрӣ дастур дод, ки бо ҷалби пажӯҳишгоҳҳои лоиҳакашӣ ва мақомоти назорати давлатии соҳавӣ сифат ва мутобиқати корҳои суратгирифтаро ба талаботи лоиҳа мавриди санҷиш қарор диҳад. Инчунин, аз прокуратураи шаҳр хоҳиш карда шуд, ки дар ин масъала комиссияи мазкурро ҳамроҳӣ намояд.