ТАШКИЛОТУ МУАССИСАҲО АЗ ШАРТНОМА МЕГУРЕЗАНД

                   Душанбе, 29 октябр. (АМИТ «Ховар», Лаззат Диловарзод).- Аз Вазорати меҳнат ва ҳифзи иҷтимоии аҳолӣ иттилоъ доданд, ки дар зарфи 9 моҳи соли ҷорӣ дар ҷумҳурӣ 25 ҳазору 309 корхона, ташкилоту муассисаҳои фаъолиятдошта, 40,8 фоизашон ба созишнома ва ва шартнома (қарордод) – ҳои коллективӣ фаро гирифта шудаанд. Вазъи бастани созишнома ва шартнома(қарордод) – ҳои коллективӣ дар фаъолияти корхонаю муассисаҳои ҷумҳурӣ ногувор боқӣ мемонад, гарчӣ дар муқоиса бо соли гузашта беҳтар ба назар мерасад.                   Мутаассифона то имрӯз аз ҷониби мақомоти иҷроияи ҳокимияти давлатии шаҳру ноҳияҳои вилояти Суғд ягон созишнома барои сабти ном ба Вазорати меҳнат ва ҳифзи иҷтимоии аҳолӣ пешниҳод нашудааст.                   Вазорат бо мақсади муайян намудани вазъи иҷрои Созишномаи генералӣ тасмим гирифтааст, ки якҷоя бо Иттиҳодияи корфармоёни ҶТ ва Федератсияи иттифоқҳои касабаи мустақили Тоҷикистон мунтазам санҷишҳо доир намуда, дар ҳар семоҳа натиҷаи онро баррасӣ намояд.