ВАЗОРАТИ ТАНДУРУСТӢ ОЗМУН ЭЪЛОН МЕКУНАД

                  Душанбе, 25 ноябр. (АМИТ «Ховар», Кристина Эрлих) – Маркази ҷумҳуриявӣ оид ба мубориза бар зидди бемории СПИД ва роҳҳои пешгирии он дар ҳамбастагӣ бо Вазорати тандурустии мамлакат бо иштироки ВАО — и электронӣ барои беҳтарин мақола, гузориш ва дигар матлабҳои муаллифӣ дар мавзӯи мубориза бар зидди бемории СПИД ва роҳҳои пешгирии он, ки ба воситаи сомонаҳои интернетӣ, барномаҳои радиоӣ ва намоишҳои телевизионӣ пахш мешаванд, озмун эълон мекунад.                   Тавре ба мухбири АМИТ «Ховар» аз маркази матбуоти Вазорати тандурустии Ҷумҳурии Тоҷикистон иттилоъ доданд, интихоби ҳаҷм ва жанри матлабҳои озмун озод буда, натиҷаи он 1 декабр Рӯзи ҷаҳонии мубориза бар зидди бемории СПИД ҷамбаст мегардад. Ғолибонро тӯҳфаҳои пулӣ интизор аст.                      Рӯзи ҷаҳонии мубориза бар зидди бемории СПИД ҳамасола 1 декабр қайд карда мешавад. Бори аввал ин Рӯз 1 декабри соли 1988 пас аз мулоқоти вазирони тандурустии ҳамаи кишварҳои ҷаҳон бо мақсади табодули таҷриба ва ахбор оид ба ин бемории хавфнок қайд карда шуд. Мувофиқи баҳогузории коршиносон бемории СПИД яке аз бузуртарин ҳодисаҳои асри 20 ба ҳисоб рафта, онро аз ҷиҳати шумораи фавтидагон ва зарари маънавӣ дар як қатор бо ҳар ду ҷанги ҷаҳонӣ гузоштаанд.