ХУҶАНДИҲО САҲМИ «РОҒУН»-РО МЕХАРАНД

                     Душанбе, 7 декабр. (АМИТ «Ховар», Бекназари Абӯбакр). — Ҷомеаи меҳнатии корхонаю муассисаҳо, ташкилотҳо ва шаҳрвандони шаҳри Хуҷанд қатори кулли мардуми шарифи Тоҷикистон Муроҷиати Президенти Ҷумҳурии Тоҷикистон Эмомалӣ Раҳмонро дар хусуси саҳмгирӣ ба сохтмони Нерӯгоҳи барқи обии «Роғун» ҳамаҷониба дастгирӣ карда, ба суратҳисоби ин иншооти бузургу беназири аср, маблағҳои худро ирсол мекунанд.                       Аҳли меҳнати Ҷамъияти саҳҳомии «Хуҷандторгмаш» дар маҷлиси умумӣ қарор карданд, ки ба нишони дастгирӣ аз сиёсати созандаи Сарвари давлат, бо дарки масъулияти шаҳрвандӣ музди меҳнати якрӯзаи худро ба хазинаи сохтмони Нерӯгоҳи барқи обии «Роғун» гузаронанд.                      Дар баробари ин, ҶДММ «Дӯстӣ-Амирхон», ҶДММ «ММК», ҷамъиятҳои саҳҳомии «САТН», «Зиннат», «Сирандуд», корхонаҳои муштараки «Само», «ВТ Силк» низ тасмим гирифтанд, ки музди меҳнати якрӯзаи кормандони худро ба суратҳисоби сохтмони Нерӯгоҳи барқи обии «Роғун» ирсол намоянд.