ХУНУКНАЗАРИИ СОҲИБКОРЗАН

                  Душанбе, 11 январ. (АМИТ «Ховар», Жасмин Назарова). – Дар кошонаи ҳусни «Гулистон» воқеъ дар кӯчаи Н. Қарабоеви ноҳияи Фирдавсӣ, ки ба соҳибкорзан Ҷамила Зоҳирова тааллуқ дорад, сӯхтор ба амал омад.                   Тибқи иттилои корманди маркази матбуоти Сарраёсати хадамоти давлатии оташнишонии ВКД ҶТ майор Кароматулло Абдуллоев, аз алангаи оташ дар масоҳати 6 метри мураббаъ шифти аз масолеҳи пластика сохташуда ва ашёи дохили кошона сӯхта корношоям гардид.                   Эҳтимол меравад, ки сӯхтор дар натиҷаи расиши кӯтоҳи ноқилҳо ба вуҷуд омада бошад, ки ин аз беэҳтиётӣ ва хунукназарии соҳибкорзан Ҷ. Зоҳирова дарак медиҳад, гуфт Кароматулло Абдуллоев.                    Айни замон аз тарафи ХДО сабаб ва зарари сӯхтор муайян карда мешавад.