КӮМАКИ ГУМРУКЧИЁН БА МАКТАББАЧАГОНИ НОҲИЯИ АЙНӢ

                  Душанбе, 27 январ. (АМИТ «Ховар», Дилшодаи Ҷонмард). -Хадамоти гумруки назди Ҳукумати Ҷумҳурии Тоҷикистон ба мактаби таҳсилоти умумии 20 — ноҳияи Айнӣ ба номи Мавлон Олимов ду адад компютер ҳадя намуд.                     Хадамоти гумруки кишвар мактаби мазкурро зери сарпарастӣ гирифтааст, зеро он ба номи собиқ муовини раиси хадамот, генерал — майори хадамоти гумрук марҳум Мавлон Олимов номгузорӣ шудааст.                     Қобили зикр аст, ки қаблан низ аз ҷониби хадамоти гумрук ба мактаби таҳсилоти умумии рақами 20 кӯмак расонида мешуд. Ҳадаф аз чунин дастгириҳои техникӣ мукаммал намудани пойгоҳи моддӣ — таълимии мактаб ва тавассути муҳайё намудани воситаҳои аёнии зарур , инчунин дастгоҳҳои омӯзишии компютер баланд бардоштани сифати таълими шогирдони мактаб мебошад.                   Аҳли кормандони мактаб барои чунин ҳусни таваҷҷӯҳ ва ғамхориву мададрасонӣ ба роҳбарияти Хадамоти гумруки назди Ҳукумати Ҷумҳурии Тоҷикистон изҳори сипоси бепоён менамоянд ва умедворанд, ки он пайваставу давомдор хоҳад буд.                   Бояд гуфт, ки чунин ғамхорӣ нисбати соҳаи маориф ба сиёсати маорифпарваронаи роҳбарияти олии кишвар созгор буда, саҳмгузории намоён дар роҳи тарбия ва ба камол расонидани соҳибони фардои ҷомеа — ояндаи дурахшони Тоҷикистон мебошад.