ТАЙЁРӢ БА ҶАШНВОРАИ БАЙНАЛХАЛҚИИ ТЕАТРҲОИ ЛУХТАК

                  Душанбе, 18 январ. (АМИТ «Ховар», Таҳмина Ғоибназарова). — Театри давлатии лухтаки ҷумҳурӣ тайёриро ба Ҷашнвораи дуюми байналхалқии театрҳои лухтак сар кард, ки таҳти унвони «Чодари хаёл» аз 15 то 22 апрел дар шаҳри Душанбе баргузор мегардад.                    Аллакай театрҳои лухтаки Озарбойҷон, Украина, Белорусия, Эрон, Хакасия ва шаҳрҳои Тошканд, Бишкек ва Оренбург хабар доданд, ки дар ҷашнвора ширкат хоҳанд варзид.                    Ба ҷашнвора меҳмонони сершумор, аз ҷумла, мутахассисони театршинос, драмнависон ва мунаққидон аз Русия, Италия ва Фаронса даъват шудаанд. Онҳо дар конфронсҳо ва мулоқотҳо ширкат варзида, дар муҳокимаи намоишҳо иштирок карда, барои ҳамкасбони тоҷики худ маҳфилҳои ихтисосӣ баргузор месозанд.                    Нишони рамзии ҷашнвора лухтаки миллии тоҷикӣ мебошад, ки аз чӯбчаҳо ва ресмонҳои гуногунранг тайёр карда шудааст. Муаллифи нишони рамзии ҷашнвора Салимшо Пиримшо мебошад.