«АПРАШКА» ТОҶИРОНРО НИГАРОН КАРДААСТ

Душанбе, 24 феврал. (АМИТ «Ховар», Лаззат Диловарзод).-  Бино ба гуфти роҳбари ҷамъияти  муҳоҷирони тоҷик дар шаҳри Санкт – Петербург Муҳиддинҷон Мӯъминов, масъалаи барҳам хӯрдани бозори «Апрашка», ки се сол боз атрофи он сухан мерафт, ахиран анҷом ёфт. Акнун дар ин бозор, ки беш аз 10 ҳазор тоҷирону ҳаммолон машғули кор буданд, маркази калони тиҷоратию фарҳангӣ бунёд мегардад. Бо иттилои ҳамин манбаъ, дар ин бозор беш аз 1000 нафар шаҳрвандони Тоҷикистон ба кори тиҷорату хизматрасонӣ машғул мебошанд. Дар сурати баста шудани он ҳамаи онҳо аз ҷои кории  худ маҳрум хоҳанд шуд. Айни замон аз тарафи мақомоти шаҳри Санкт – Петербург таҳқиқи таърихию меъмории ҳавлии Апрескин то моҳи март анҷом дода, тасмим гирифта мешавад, ки ба сохтмони маркази нави тиҷоратӣ — фарҳангӣ иҷозат дода мешавад ё не. Барои тоҷирони тоҷик дар атрофии мавзеи  «Гражданка»  ҷой ҷудо карда мешавад, аммо ба гуфти М.Мӯъминов, дар ҷои нав танҳо 250 – 300 нафар тоҷири тоҷикистониро ҷой додан мумкин, ҳол он ки сухан  сари ҳазорон нафар тоҷирони Осиёи Миёна меравад.