БА ТОҶИКИСТОН ЧӢ ҚАДАР КӮМАК РАСИДААСТ?

Душанбе, 2 феврал.(АМИТ «Ховар», Марзия Саидова).- «Дар соли 2009 ба Агентии давлатии захираҳои моддии назди Ҳукумати Ҷумҳурии Тоҷикистон аз кишварҳои хориҷӣ ҳудуди 6 миллион доллар кӯмаки башардӯстона  расидааст», гуфт зимни мусоҳиба ба хабарнигори АМИТ  «Ховар» муовини директори Агентии давлатии захираҳои моддии назди Ҳукумати Ҷумҳурии Тоҷикистон Соҳибҷон Зиёдуллоев. Мавсуф афзуд, ки кӯмакҳои башардӯстона асосан аз маводи сохтмонӣ, хӯрока ва либос иборат буда, аз кишварҳои Русия, Қазоқистон, Белорус, Туркия, Ҳиндустон,  Чехия, Словакия, Австрия, Қирғизистон ва Ӯзбекистон ба Тоҷикистон фиристонида шудааст. Танҳо бар асари офати табиии дар ноҳияи Хуросон дар соли 2009 ба амаломада давлати ҳамсояи Ӯзбекистон 20 қатора маводи сохтмон ва хӯрока фиристонида буд. Инчунин, Ҷумҳурии Тоҷикистон тавассути Агентии давлатии захираҳои моддӣ дар соли 2008 вобаста ба заминларзаи дар Қирғизистон ба вуқӯъпайваста ба ин кишвари ҳамсоя ҳудуди 600 тонна бор кӯмаки башардӯстона расонид. Бояд зикр кард, ки Агентии давлатии захираҳои моддии назди Ҳукумати ҷумҳурӣ агентии навтаъсис буда, аз соли 2008 инҷониб фаъолият дорад. Тибқи супориши Ҳукумати Ҷумҳурии Тоҷикистон Агентӣ дар давоми фаъолияти худ ба шаҳру ноҳияҳои Кӯлоб, Қумсангир, Панҷ ва Хуросон кӯмакҳои моддӣ расонидааст. Инчунин, бо мақсади паст гардонидани шиддатёбии болоравии нархи баъзе маҳсулот дар як қатор бозорҳои шаҳру ноҳияҳои кишвар молҳои мавриди ниёзро таъмин намудааст.