БАРНОМАИ НАВИ ҲАРБИИ РУСИЯ МАЪҚУЛ ДОНИСТА ШУД

Маскав, 9  феврал. (АМИТ «Ховар», Ҳалима Хушқадамова). —    Дар  котиботи Созмони   аҳдномаи   амнияти  дастаҷамъӣ  ба  барномаи   нави  ҳарбии  Федератсияи  Русия  баҳои  мусбат  дода шуд. Муншии  умумии созмон  Николай  Бордюжа ба  хабарнигорон  гуфт, ки  барномаи  мазкур  вазъи  воқеии   замони  ҳозираро  дар  соҳаи   таъмини  амният инъикос  менамояд. Барои  СААД ҳаминаш муҳим  аст, ки  таҳкими   низоми  амнияти  дастаҷамъӣ  дар  доираи  созмон  ба  вазифаи   асосии  Русия  дар  масъалаи  боздоштан ва  пешгирӣ  кардани  муноқишаҳо  баробар  карда  шудааст. Дар  барнома  гуфта  мешавад, ки  Федератсияи  Русия  ҳуҷуми  мусаллаҳонаро  ба  яке  аз  давлатҳои  аъзои  созмон  ҳамчун  таҷовуз  ба  муқобили  ҳамаи  давлатҳои  аъзои  он  мешуморад ва  дар  ин  маврид  мувофиқи  аҳдномаи  амнияти дастаҷамъӣ  амал  хоҳад  кард. Барномаи нав  нишон  медиҳад, ки  Русия  ӯҳдадориҳои  иттифоқчигии  дар  доираи  созмон  базиммагирифтаашро  иҷро  хоҳад  кард,  гуфт  Н.Бордюжа.   Барномаи нави  ҳарбӣ  инчунин  иштироки  Русияро  дар  ҳамаи  тадбирҳои   марбут ба  таъмини  амнияти  дастаҷамъӣ  пешбинӣ  менамояд.