СУДЯ ОБРӮЯШРО БО 2 ҲАЗОР ДОЛЛАР ФУРӮХТ

Душанбе, 4 феврал. (АМИТ «Ховар», Лаззат Диловарзод).- Ҳангоми гузаронидани корҳои фаврӣ — ҷустуҷӯӣ муайян карда шуд, ки судяи суди ноҳияи Фирдавсии шаҳри Душанбе Маъруф Нуриддинов барои татбиқ намудани Қонуни ҶТ «Дар бораи авф» бо парвандаи ҷиноятӣ нисбат ба шаҳрванд «А» ва ҳамсараш аз онҳо 2 ҳазор доллари амрикоӣ талаб кардааст. Дар натиҷаи андешидани чораҳои фаврӣ — ҷустуҷӯӣ рӯзи 30 – юми декабри соли 2009 судя  М.Нуриддинов зимни гирифтани маблағи 2 ҳазор доллар ба сифати пора аз шаҳрванд «А»,  дар назди майдончаи «Юност» — и шаҳри Қурғонтеппа дастгир карда шуд. Ҳоло нисбати М. Нуриддинов аз тарафи Раёсати Агентӣ бо моддаи 319 қ.4 (гирифтани пора) – и КҶҶТ парвандаи ҷиноӣ оғоз карда шуда, тафтишоти пешакӣ идома дорад.