ГЕРОИН ДАР ДУНБА

Душанбе, 29 март (АМИТ «Ховар», Лаззат Диловарзод).- Кормандони Хадамоти гумруки ҶТ дар боздошти садҳо кило маводи мухаддир саҳм доранд. Бино ба иттилои дафтари матбуотии хадамоти мазкур, 18 – уми марти соли ҷорӣ дар минтақаи  роҳи оҳани ноҳияи Турсунзода аз қатораи мусофирбари самти «Душанбе — Москва» аз зарфи пластики ғунҷоишаш 20 литр, ки ба шаҳрванд Лутфулло Мирахмедов тааллуқ дошта, гӯё аз Душанбе ба Федератсияи Русия барои тайёр кардани оши палав равғани дунба мебурдааст, 13 кило маводи мухаддири сахттаъсири героин дарёфт ва мусодира карда шуд. Акнун ба саволи кормандони тафтишот Лутфулло Мирмухамедов худ ҷавоб мегӯяд, ки ӯ равғани дунбаи героиндорро барои оши палави кӣ бурданӣ буд.