КӮМАКИ ИҶТИМОӢ БА КОРГАРОНИ МУҲОҶИР

Душанбе,  5 март. (АМИТ «Ховар», Наталя  Михайлова). —  Шӯъбаи  муҳоҷирати Консулхонаи  Сафорати Ҷумҳурии  Тоҷикистон  дар  Федератсияи  Русия  дар  давоми  моҳҳои  январу  феврали  соли  равон  ба  коргарони  муҳоҷири  тоҷик,  ки  дар  Русия  кор  мекунанд,  кӯмаки  муайяни   молиявӣ, иҷтимоӣ ва  ҳуқуқӣ  расонд. Аз  ҷумла,  барои расонидани  кӯмак ба шаҳрвандони  Тоҷикистон, ки  ҷойи  муайяни  истиқомат  надоранд,  бо  дармонгоҳи  рақами  7 – уми  шаҳри  Маскав  дар  бораи   расонидани   кӯмаки тиббии  бепул   паймон  карда шуд.  Инчунин   дармонгоҳи  мазкур   барои  беморон ва  шахсони  маъюб  бо  мақсади  ба  фурудгоҳҳо  ва   истгоҳи  роҳи  оҳан  бурдани  беморон ва  маъюбон  автобус  ҷудо  намуд. Шӯъбаи  муҳоҷират  бо  марказҳои  кӯмаки  иҷтимоии  «Люблино» ва «Ясенево» — и  шаҳри  Маскав дар бораи  муваққатан  ҷой  додани   коргарони  муҳоҷири  бесарпаноҳ ва  бо хӯроки  гарм  таъмин  кардани онҳо  ҳамкорӣ  мекунад.  Шӯъбаи  муҳоҷират  барои  ба  ватан  фиристодани   баъзе шаҳрвандони  Тоҷикистон кӯмаки  моддӣ  расонида,  инчунин  барои онҳо  чипта  харид. Аз  дафтари  матбуоти  Сафоратхонаи  Тоҷикистон  дар  Маскав  ба  АМИТ «Ховар»  хабар  доданд, ки тибқи  дархости  шӯъбаи  муҳоҷират  айни  ҳол  се  шаҳрванди Ҷумҳурии Тоҷикистон  дар  шифохонаҳои  шаҳри  Маскав  хобонда шудаанд. Онҳо  то   муайян  намудани  шахсияташон  ва  ҷустуҷӯи  маблағ  барои  харидани  чипта барои  фиристоданашон ба  ватан дар  шифохонаҳо  нигоҳ  дошта  мешаванд.