САФАРИ ДИРЕКТОРИ ХАДАМОТИ ФЕДЕРАЛИИ НАЗОРАТИ МАВОДИ НАШЪАДОРИ РУСИЯ БА АФҒОНИСТОН

Маскав,  17 март. (АМИТ «Ховар», Халима  Хушқадамова). – Раиси Кумитаи   давлатии мубориза ба  муқобили  маводи нашъадор,  директори Хадамоти  федералии  назорати  маводи  нашъадори  ин  мамлакат  Виктор  Иванов  барои боздиди   корӣ ба  Давлати Исломии  Афғонистон рафт. В.Иванов 16  март  дар  Кобул бо  ноиби  Президенти  Афғонистон  Карим  Халилӣ  мулоқот  анҷом  дод.  Дар  ҷараёни он  масъалаҳои  марбут ба  кам  кардани  истеҳсоли  маводи  нашъадор  дар  Афғонистон   ва  маҳдуд  сохтани  интиқоли он  ба  мамлакатҳои дигар  муҳокима  шуданд. Зикр  шуд,  ки  муборизаи  самарабахш  ба  муқобили  маводи  нашъадор бе  пешрафти  иқтисодию фарҳангии  мамлакат  имконнопазир  аст. Мухбири  АМИТ «Ховар»  хабар  медиҳад, ки  ин  мулоқоти дуюми  В.Иванов  бо  Карим  Халилӣ  мебошад. Онҳо  бори  аввал   моҳи  майи  соли  2009   дар  Маскав  мулоқот  карда буданд. В.Иванов   дирӯз  инчунин  бо  раисони  палатаҳои   таҳтонӣ ва фавқонии  парлумони  Афғонистон Юнуси  Конунӣ  ва Сибқатулло  Муҷаддадӣ  мулоқот  кард. Баъдан  дар  сафоратхонаи  Федератсияи  Русия  дар  Кобул  машварати  намояндагони  созмонҳои  зидди  маводи нашъадори  мамлакатҳои  хориҷӣ  баргузор гардид. Дар он   намояндагони  Русия, ИМА, Британияи  Кабир,  Италия, Олмон,  Чин, Эрон, Қазоқистон ва  мамлакатҳои  дигар  ширкат  варзиданд. В.Иванов  шоми  дирӯз барои  хабарнигорон  нишасти  матбуотӣ ташкил  намуд.  Сафари  кории  В.Иванов  ба  Афғонистон то  18  март  давом  мекунад.