ТАҶЛИЛИ ИДИ НАВРӮЗ ДАР ДАНҒАРА

Ноҳияи  Данғара,  19 март. (АМИТ «Ховар», Бекназари  Абӯбакр,  Дилшода  Ҷонмардова). – Тибқи  анъана, иди  Наврӯз  ҳар  сол  дар  яке  аз   минтақаҳо  ё  шаҳрҳои  Тоҷикистон  ҷашн  гирифта  мешавад. Иди Наврӯз  имсол дар  ноҳияи  Данғараи  вилояти  Хатлон баргузор  мегардад. Дар он Президенти  ҷумҳурӣ  Эмомалӣ  Раҳмон  ва  меҳмони  олиқадр – Президенти  Туркманистон  Қурбонгулӣ  Бердимуҳаммадов  иштирок  мекунанд, ки  барои боздиди  давлатӣ  ба  Тоҷикистон омадааст. Эмомалӣ  Раҳмон ҳамроҳи  Президенти  Туркманистон  субҳи  имрӯз ба  ноҳияи  Данғара омаданд. Мухбирони  АМИТ «Ховар»  аз  ноҳияи  Данғара  хабар  медиҳанд, ки барои таҷлили  бошукӯҳи  иди  Наврӯз  дар  ин  ҷо  барномаҳои  гуногун  тартиб  дода  шудаанд. Аз  ҷумла,  ғайр  аз  ташкили  сайру  гаштҳои оммавӣ,  мусобиқаҳои  гуногуни  варзишӣ  бо  иштироки  устодони  санъату  ҳунари  мамлакат   саҳнаи  бошукӯҳи  идона  намоиш  дода  мешавад. Дар  кӯчаю  майдонҳои  маркази  ноҳия  намоишгоҳҳо  ва  фурӯшгоҳҳои  маҳсули  дастони  устоҳои  халқӣ  ва   маҳсулоти  қаннодӣ  ташкил  карда шудаанд. Дар  ноҳияи  Данғара ба  шарафи  иди  Наврӯз  силсилаи  муассисаҳои  гуногуни  фарҳангию  иҷтимоӣ  ба  истифода дода  мешаванд.  Аз  ҷумла,  дар  рӯзи  ид   чойхонаи  миллӣ  дар  Боғи   фарҳангу  фароғати  маркази  ноҳия,  филиали  «Ориёнбонк»  дар  ноҳия,   маркази  калони тиҷоратӣ,  бинои   гимназия — интернат,  корхонаи  хишт  дар  деҳаи  Парқамчӣ ва ду   бинои 5 – ошёнаи  истиқоматӣ ба  истифода дода,  боғи  марказии   фарҳангу  фароғати  ноҳия ба  куллӣ тармим  карда  мешавад.