ТАҚВИЯТИ МУБОРИЗА БА МУҚОБИЛИ ПАҲН ГАРДИДАНИ АСЛИҲАИ ҚАТЛИ ОМ

Душанбе,  12 апрел. (АМИТ «Ховар», Кристина  Эрлих ). —  12  апрел  дар  Душанбе  дар  масъалаи   имконияти   паҳн  гардидани  терроризм  ва тақвияти  мубориза ба  муқобили  паҳн  гардидани  аслиҳаи  қатли ом  дар  Осиёи  Марказӣ конфронси байналхалқӣ  кушода шуд. Конфронс  бо ташаббуси  Агентии  амнияти   ядроӣ  ва  радиатсионии  Академияи  илмҳои  Ҷумҳурии  Тоҷикистон бо  дастгирии  молиявии  Маркази   байналмилалии  илмию техникӣ  гузаронида  мешавад.  Дар  конфронс  директори Агентии амнияти  ядроӣ   ва  радиатсионии  Академияи  илмҳои  Ҷумҳурии  Тоҷикистон  Ӯлмас  Мирсаидов,  муовини  мудири  иҷроияи  Маркази байналмимлалии  илмию техникӣ Лео  Овсиатски ва  намояндагони  Қазоқистону  Қирғизистон,  Русия  ва  ИМА  иштирок  доранд. Мухбири  АМИТ «Ховар»  хабар  медиҳад, ки  Ӯлмас  Мирсаидов  конфронсро  кушода,  дар  мавзӯи  «Таҳлили  зуҳуроти  паҳн  гардидани  аслиҳаи  қатли  ом»  маърӯза  кард.  Инчунин   намояндагони  Донишгоҳи  миллии  таҳқиқоти  ядроии  Федератсияи  Русия,  корхонаи  «Изотоп» — и  Агентии  таҳқиқоти  атоми  Федератсияи  Русия  ва намояндагони   корхонаю  муассисаҳои  дахлдори  Тоҷикистон  роҷеъ ба  масъалаҳои  рӯзномаи  конфронс  сухан  ронданд.  Конфронси  мазкур  ду  рӯз  давом  мекунад.