ҒАМХОРИИ ҲУКУМАТИ ТОҶИКИСТОН ДАР СОҲАИ МАОРИФ

Душанбе, 20 май. (АМИТ «Ховар», Лаззат Диловарзод).- Дар натиҷаи ғамхории пайвастаи Ҳукумати ҷумҳурӣ солҳои охир  маблағгузории соҳаи  маориф  ба таври назаррас афзоиш ёфт. Агар соли 2000 –ум аз ҳисоби буҷаи давлат барои ин соҳа ҳамагӣ 42 млн. сомонӣ ҷудо шуда бошад, пас дар соли 2009 бо дарназардошти ҳамаи манбаъҳои маблағгузорӣ ва буҷети тасдиқшуда, ҳаҷми он ба 1 млрд. 70 млн. сомонӣ расонида шудааст. Ба тарзи дигар агар гуфтан ҷоиз бошад, буҷети соҳаи маориф дар  муддати 9 сол қариб 26 баробар афзудааст. Соли 2009 аз ҳисоби ҳамаи манбаъҳои маблағгузоришаванда сохтмону азнавсозии 218 мактаб анҷом ёфт, ки дар онҳо 40 ҳазор ҷойи нишаст мавриди истифода қарор ёфтааст.