ОҒОЗИ САРМОЯГУЗОРӢ БА МАБЛАҒИ 1 МЛРД. 300 МЛН. СОМОНӢ

Душанбе, 24 май. (АМИТ «Ховар», Лаззат Диловарзод).- Дар вохӯрие, ки вазири меҳнат ва ҳифзи иҷтимоии аҳолии ҷумҳурӣ Маҳмадамин Маҳмадаминов дар Бонки миллӣ бо намояндагони созмонҳои  бонуфузи байналмилалӣ доир намуд, бо пуштибонӣ аз Паёми   Президенти ҶТ ба Маҷлиси Олӣ зикр карда шуд, ки дар соҳаҳои гуногуни иқтисоди мамлакат  55 лоиҳаи сармоягузорӣ аз ҷоиби Ҳукумати ҷумҳурӣ ба маблағи 8 млрд. сомонӣ ҷалб карда шудааст. Танҳо соли ҷорӣ татбиқи 14 лоиҳаи нави сармоягузории давлатӣ ба маблағи 1млрд. 300 млн. сомонӣ оғоз  гардидааст. Вазири меҳнат ва ҳифзи иҷтимоии аҳолӣ Маҳмадамин Маҳмадаминов оид ба ҳамкориҳои дуҷониба миёни вазорати мазкур ва ташкилоту созмонҳои  донорӣ сухан ронда, оид ба натиҷаву   самараи лоиҳаҳои татбиқшуда нисбат ба фаъолияти Барномаи рушди СММ, лоиҳаи кӯмаки техникии Комиссияи Иттиҳоди Аврупо, Сафоратхонаи Ҷопон дар Тоҷикистон, Кумитаи имдоди имом Хумайнӣ, қарордоди тарафайн байни ҷамъияти ҳамкориҳои техникии Олмон, ТИКА ва Муассисаи давлатии «Маркази таълими калонсолони Тоҷикстон» баҳои баланд дод.