ЯГОНА МАРКАЗИ КАСБӢ ДАР ОСИЁИ МАРКАЗӢ

Душанбе, 27 май. (АМИТ «Ховар», Лаззат Диловарзод).-  Бино ба гуфти директори «Маркази омӯзиши калонсолон» -и Вазорати меҳнат ва ҳифзи иҷтимоии аҳолӣ Алишер Фаромӯзов, дар давоми ду соли  мавҷудияти маркази мазкур,  дар чор филиали он дар шаҳрҳои Қӯрғонтеппа, Кӯлоб, Конибодом ва ноҳияи Тоҷикобод беш аз 8 ҳазору 600 нафар одамон аз рӯи 42 ихтисос соҳибкасб гардиданд, ки 70 фоизи хатмкунандагон  дар дохилу хориҷи кишвар аз рӯи ихтисосашон кору фаъолият мекунанд. «Маркази омӯзиши калонсолон» дар минтақаи Осиёи Марказӣ ҳамчун муассисаи таълимӣ  барои тайёр кардани одамони калонсоли соҳибкасб ягона муассисаи давлатие мебошад, ки аз рӯи рақобатпазирӣ дар бозори меҳнат шахсони соҳибкасбро тайёр мекунад. Марказ муносибатҳои хуби ҳамшарикиро бо давлатҳои Германия, Эрон ва Русия ба роҳ монда, дар соли ҷорӣ 2 ҳазор нафар аз курсҳои касбомӯзи мегузаранд. Дар назар аст, ки дар оянда шумораи ба курсҳо фарогирифташаванда 2 баробар зиёд карда мешаванд.