ҶИНОЯТКОРОН ДАСТГИР ШУДАНД

Душанбе, 15 июн. (АМИТ «Ховар», Жасмин Назарова). — Аризаи шаҳрванд Олимҷон Ашурови 27 — сола, истиқоматкунандаи ҷамоати Коммунизм, деҳаи Қалъачаи-Араби шаҳри Истаравшани вилояти Суғд, ба шӯъбаи корҳои дохилии шаҳри Истаравшан ворид гардид, ки 9 июни соли равон соати тақрибан 21 шахсони номаълум дар ҳудуди автовокзали шаҳри Истаравшан, бо таҳдиди истифодаи зӯроварӣ аз ӯ маблағи пулӣ 200 доллари ИМА-ро тамаъҷӯӣ намуда, аз ҷойи ҳодиса ғайб задаанд. Тибқи иттилои корманди дафтари матбуоти Вазорати корҳои дохилии ҶТ, дар натиҷаи гузарондани чораҳои фаврӣ-ҷустуҷӯӣ аз ҷониби кормандони шӯъбаи бахши кофтукови ҷиноии вилояти Суғд шаҳрвандон Муродҷони Яҳёзода соли таваллудаш 1992, бекор, Ҳасан Азимов соли таваллудаш 1991, бекор, Бобурҷони Эгамберди соли таваллудаш 1991, бекор, Элмурод Алимов соли таваллудаш 1991, бекор ва Ғайратҷон Турсунов соли таваллудаш 1991, бекор, сокинони шаҳри Истаравшан, ҳамчун гумонбар дастгир карда шудаанд. Нисбати ин шахсон парвандаи ҷиноӣ бо моддаи 250 (қ.2) КҶ ҶТ оғоз карда шуд.