БАРРАСИИ МАСЪАЛАИ БАРҚАРОР СОХТАНИ СИСТЕМАИ ЯГОНАИ ЭНЕРГЕТИКИИ ОСИЁИ МАРКАЗӢ

Душанбе,  24 июн. (АМИТ «Ховар»). —  Намояндагони  мамлакатҳои  аъзои  Шӯрои ҳамоҳангсози  энергетикии  Осиёи  Марказӣ  имконияти  барқарор  сохтани  системаи  ягонаи  муттаҳидаи  энергетикии  минтақаи  Осиёи  Марказиро  баррасӣ  менамоянд.  Дар  ин  бора  раиси  ширкати  идораи   шабакаҳои  барқи Қазоқистон  Алмасадам  Саткалиев  ба  АМИТ «Ховар»  хабар  дод. Бояд  гуфт, ки  ба  Шӯрои  ҳамоҳангсози энергетикии  Осиёи  Марказӣ  Қазоқистон,  Қирғизистон, Тоҷикистон  ва  Ӯзбекистон  дохил  мешаванд. А.Соткалиев  ба  журналистон  хабар  дод, ки  23  июн  масъалаи  мазкур  дар  Алмаато  муҳокима  карда  шуд. Ба  қавли  А.Соткалие,  барқарор  сохтани  системаи  ягона ва  муттаҳидаи  энергетикии  Осиёи  Марказӣ  ба  бештар  гардидани эътимоднокии таъминоти   қувваи  барқ  дар  ҳамаи  мамлакатҳои  минтақа   мусоидат  менамояд. Ёдовар  мешавем, ки  соли  2009  дар  натиҷаи   ихтилофоти   системаҳои  энергетикии  Тоҷикистон  ва  Ӯзбекистон   фаъолияти   якҷояи   системаи  энергетикии  Осиёи  Марказӣ  халалдор  гардид.  Дар  натиҷа   системаи  энергетикии  Тоҷикистон  дар  мавсими  тирамоҳу  зимистони  солҳои  2009 – 2010   мустақилона  кор  кард. А.Соткалиев   зикр  кард, ки барои  баргардонидани   системаи  энергетикии  Тоҷикистон  ба   системаҳои  энергетикии  мамлакатҳои  Осиёи  Марказӣ  розигии  Ӯзбекистон  зарур  мебошад. Зеро  тамоми  қарорҳо  дар  Шӯрои  ҳамоҳангсоз  бо  розигии  ҳамаи  тарафҳо  қабул  карда  мешаванд. Муовини  аввали   раиси   ширкати «Барқи  тоҷик»  Баҳром  Азимов  изҳор  намуд, ки  Тоҷикистон  дорои   захираҳои  фаровони   энергетикӣ  буда,   имкон  дорад, ки   қувваи барқи  арзони  худро  ба  мамлакатҳои  дигари  Осиёи  Марказӣ  фурӯшад.  Вай  зикр  намуд, ки  ин  масъала  ҳамроҳи  намояндагони  мақомоти  дахлдори  Ӯзбекистон  ҳал  карда  мешавад. Мо  қарор  додаем, ки  гуфтушунидҳоро  дар  ин  бобат  давом  диҳем,  гуфт  Б.Азимов. Сардори   маркази  миллии   танзими   ширкати  «Ӯзбекэнерго»  Исо  Саъдуллоев  гуфт, ки   Ӯзбекистон  тайёр  аст,  гуфтушунидҳоро  дар  ин  масъала  давом  диҳад. Мо  имрӯз  кӯшиш  мекунем, ки  камбудию  ихтилофоти  соли  гузашта бамиёномадаро  бартараф  намуда,  фаъолияти  якҷояи   тамоми   системаҳои  энергетикии  мамлакатҳои  минтақаро  аз  нав  ба  роҳ  монем, гуфт  намояндаи  Ӯзбекистон.