ОБҲОИ «ШОҲАМБАРӢ» ҚАЛБАКИСТ?

Душанбе, 1 июн. (АМИТ «Ховар», Бекназари Абӯбакр). — Имрӯз дар Агентии стандартизатсия, метрология, сертификатсия ва нозироти савдои назди Ҳукумати Ҷумҳурии Тоҷикистон бо иштироки намояндагони корхонаҳои истеҳсоли обҳои нӯшокии ғайриспиртӣ ва яхмоси шаҳри Душанбе ва ноҳияҳои тобеи марказ семинар-машварат баргузор гардид.  Директори Агентии давлатии «Тоҷикстандарт» Давлаталӣ Ҳотамов аз арзу шикояти истеъмолкунандагон тавассути ВАО ва ба дастгоҳи марказии Агентӣ оид ба паст будани сифати обҳои нӯшокӣ ва яхмосҳо изҳори нигаронӣ карда, гуфт, ки имрӯз Ҳукумати мамлакат тамоми чораҳои заруриро меандешад, то соҳибкорӣ дар кишвар рушд кунад. Аз ин рӯ, соҳибкорон низ бояд ин иқдомҳои Ҳукумати мамлакатро ба инобат гирифта, аз истеҳсоли маҳсулоти пастсифат ва ғайристандартӣ худдорӣ намоянд. Дар семинар-машварат зикр гашт, ки имрӯз харидорӣ ба обҳои нӯшокии маъдании соф, аз ҷумла оби маъдании «Шоҳамбарӣ» торафт кам шуда истодааст. Сабаби аслии ин истеҳсоли қалбакии ин тамғаи об мебошад, ки ба коста гардидани эътиқоди истеъмолкунандагон оварда расонидааст.