МУЛОҚОТИ ҚАРИБУЛВУҚӮИ САРДОРИ ДАВЛАТ БО ВАРЗИШГАРОН

Душанбе, 11 август. (АМИТ «Ховар», Пайрав Назаров).- Ҷавонони фаъоли ноҳияи Спитамен, Конибодом ва Истаравшани вилояти Суғд бо раиси Кумитаи ҷавонон, варзиш ва сайёҳии назди Ҳукумати ҶТ Маликшо Неъматов мулоқот намуданд. Тавре аз Кумитаи ҷавонон, варзиш ва сайёҳии назди Ҳукумати ҶТ ба хабарнигори АМИТ «Ховар» хабар доданд, Маликшо Неъматов дар мулоқот бо ҷавонони ноҳияҳои мазкур дар бораи роҳи тайшуда ва аҳамияти Истиқлолияти ҶТ, ки имсол 19 солагии онро ҷашн мегирем, сӯҳбат намуд. Ҳамчунин, Маликшо Неъматов аз қасри солимгардонии «Сомониён»-и нохияи Ҷаббор Расулов дидан карда, бо ҷавонон ва варзишгарони ноҳияи мазкур низ мулоқот намуд. Баъди мулоқоти пурмӯҳтаво М. Неъматов аз иштирокчиён даъват кард, ки пешниҳод ва мулоҳизаҳои хешро то оғози мулоқоти Президенти Ҷумҳурии Тоҷикистон Эмомалӣ Раҳмон бо  варзишгарони кишвар, ки моҳи сентябри соли 2010 баргузор мегардад, омода намоянд.