ХАБАРИ TOJNEWS САҲЕҲ НЕСТ

Душанбе, 20 сентябр. (АМИТ «Ховар», Дилшодаи Ҷонмард).- 18 сентябри соли ҷорӣ дар сайти TojNews ва боз чанд сайти дигар зери сарлавҳаи «Задухӯрди мусаллаҳона дар деҳаи Чанорои Файзобод», хабаре чоп шудааст, ки дар он аз  ҷумла омадааст: «… Дар натиҷаи ин задухӯрд, ки тақрибан соатҳои 2:30 дақиқаи шаби гузашта дар ҳавлии сокини деҳаи Чаноро Ш. К. ба вуқӯъ пайвастааст, маҳбусони фирорӣ 3 нафар афсарони мақомоти қудратиро ярадор кардаанд…Дар ин задухӯрд муовини раиси Кумитаи давлатии амнияти миллии Тоҷикистон Саидбек Рустамов аз китф ва раиси бахши файзободии Кумитаи давлатии амнияти миллии Ҷумҳурии Тоҷикистон (КДАМ ҶТ) аз даст ва гардан ярадор шуда, ба беморхона афтодаанд…»             Тибқи маълумоти аз маркази робитаҳои ҷамъиятии Кумитаи давлатии амнияти миллии Ҷумҳурии Тоҷикистон (КДАМ ҶТ) ба АМИТ «Ховар» расида, на се, балки ду нафар кормандони амният захм бардоштаанд. Инчунин, Саидбек Рустамов дар вазифаи муовини Раиси КДАМ набуда, корманди ҳамин ниҳод мебошад. Сардори бахши файзободии Кумита низ захмин нашудааст.