ЗИЁИЁНИ СУҒД: «АМАЛИ НАНГИН МАРДУМИ МОРО БОЗ ҲАМ САРҶАМЪ МЕНАМОЯД»

Душанбе, 23 сентябр. (АМИТ «Ховар», Бекназари Абӯбакр). — «Мо, аҳли илму адаби вилояти Суғд аз ҳодисаи фоҷеабори ҳуҷуми мусаллаҳона ба автомошини сарбозони Артиши миллӣ, ки нимаи рўзи 19 — уми сентябри соли равон дар ноҳияи Рашт рух додааст, андўҳгин буда, ба волидону наздикони нафарони дар ин воқеа ҳалокшуда изҳори тасаллияту ҳамдардӣ менамоем», — омадааст дар муроҷиатномаи зиёиён ва адибони вилояти Суғд. Гуфта мешавад, ки ин кирдори ноҷавонмардонаи нафароне, ки барояшон осоишу ободии кишвар, хонаи ободу дили шоди кӯдакон, сарсабзии меҳани азизу сулҳу осоиш арзише надорад, аз ҷониби аҳли зиёи вилоят маҳкум карда шуд. Мардуми мо ҳанӯз захмҳои фоҷеаи солҳои навадумро фаромӯш накардааст, он солҳо барои ба даст овардани сулҳу осоиштагӣ, амнияту ҳамдигарфаҳмӣ  мардуми кишвар басо ҷонбозиҳо намуданд. Имрӯз  зери хатар гузоштани муҳити осоиштаву ороми кишвар аз ҷониби хиёнаткорони миллат кулли сокинони Тоҷикистонро бетараф гузошта наметавонад. Барои ҳар фарди соҳибақли Тоҷикистон сулҳ, ваҳдат ва осоиштагӣ муқаддасу гиромист. Бинобар ин ҳифзи ин арзишҳои миллӣ, ки асоси пешравӣ, тараққиёт ва сарсабзии кишвар аст, вазифаи масъулиятноки ҳар кадоми мост. «Мо, аҳли кишвар — бовар дорем, ки ин амали нангину хиёнаткоронаи ашхоси хиёнатпеша мардуми моро боз ҳам сарҷамъ менамояд, Ваҳдати моро мустаҳкаму дӯстиамонро қавитар месозад. Миллати сарбаланди моро сарҷамъиву муттаҳидӣ ва боварӣ ба ояндаи дурахшон раҳнамун мешавад», — махсус таъкид шудааст дар муроҷиатнома. Ин муроҷиат бо имзои адибон ва зиёиёни шинохтаи вилоят Аҳмадҷони Раҳматзод, Атахон Сайфуллоев, Фарзона, Муҳиддин Хоҷазод, Аъзам Сидқӣ, Карим Абдулов, Муҳаммад Субҳон, Нурмуҳаммад Ниёзӣ ва дигарон қабул гаштааст.